Nongstoiñ, K’lyngkot, 10: Ka Ïingkashari Special Judge (POCSO) ka West Khasi Hills, ka la hukum ban set along bun snem ïa ki ar ngut ki runar kiba donkti ban leh beijot ïa ki khynnah rit ha ki ar tylli ki jingjia, iwei iba dang 10 snem bad iwei I ba dang 13 snem ka rta kiba la jia ha u snem 2018.
Ha kawei na kine ki jingjia, uwei u runar u la leh beijot ïa iwei i Khynnah 10 snem ha u bnai Nohprah 2018 bad une u runar u kyrteng u Slanbor Marweiñ, u ba la shah kem ha ki Pulit ka Nongstoiñ Police Station halor ka ejahar ba la mudui pyrshah ïa u ha ka 7 tarik Nohprah, 2018.
Ki pulit kila register case ïa u Slanbor hapoh ka kyndon 506 IPC pule lang bad ka 5 (m) (n)/6 POCSO Act ïa kaba la tohkit da ka WPSI F.K Marak jong ka Nongstoiñ Women Police Station.
Ka Ïingkashari POCSO ha ka 3 tarik Kyllalyngkot, ka la pynmih ïa ka hukum ban set along ïa une u runar haduh 10 snem nalor ka kuna ba T.30,000, halor ka kyndon 6 jong ka POCSO Act bad set phatok sa shi snem bad ka kumba T.5000 katkum ka kyndon 506 IPC.
Ha kawei pat ka jingjia, uwei u runar u la leh beijot ïa I khynnah 13 snem ha u bnai Naitung, 2018 bad une u briew u kyrteng u Pynshailin Sangriang, ïa u ba la kem da ki Pulit ka Nongstoiñ Police Station halor ka ejahar ba la mudui pyrshah ïa u ha ka 25 tarik Naitung 2018.
Ïa une u briew la register case hapoh ka kyndon 7/8 jong ka POCSO Act bad la tohkit hi ïa ka da ka WPSI F.K Marak jong ka Nongstoiñ Women Police Station.
Ka Ïingkashari ha ka 5 tarik Kyllalyngkot, ka la hukum set phatok ïa une u briew haduh 7 snem lem bad ka kuna kaba T.20,000 katkum ka kyndon 4 jong ka POCSO Act.
