Sngi Thohdieng yn shim rai ka sorkar halor lai tylli ki Medical College ha ka jylla

Shillong, Nailar 23 : U Myntri Rangbah ka jylla, Conrad K Sangma ha ka sngi Balang u la ong ba ka sorkar jylla ha ka sngi Thohdieng kan sa shim ïa ka rai haba ïadei bad ki lai tylli ki Medical College ban seng hapoh ka jylla. “Ïa ka rai ngin sa shim lashisngi (Sngi Thohdieng). Kumba nga la ong, ngi la dep ban bishar bniah ha kine ki khyndiat snem bad kumta ha kine ki khyndiat taïew ngi la don bun ki jingïalang bad ka Myntri ka Koit ka Khiah. Kumta ïa kane ngin rah ha kane ka Sngi Thohdieng bad ngin sa shim ki rai kiba kongsan bha ha ka kynhun myntri,” u la ong haba kren bad ki lad pathai khubor.
Shwa kane, u Myntri Rangbah u la ong ba ka sorkar jylla kan sa pynbna ïa ka jingthmu ban seng la kumno kumno haduh lai tylli ki Medical College.
“Ngin sa buh da ka por kumno ban leh bad ha kajuh ka por kumno ban pyntreikam ïa ka pisa. Kumta da ka jingpyndep ïa kitei ki lai tylli ki medical college kiban sa don hangne, ngi tikna ba ngin lah ban pynmih kham bun ban ïa kaba ngi ïoh mynta bad ruh nalor ba ka kham suk ha ka jylla lajong,” u la ong.
U la ong ruh ba ka Myntri katei ka tnad ka la shimkhia bha halor katei ka bynta namar kadei ka bynta kaba donkam shibun ka jinglut kaba hap pat ïa ka jingtuklar jong u.
“Ngi la dep leh ïa kane ha ka taïew ba la dep bad mynta ka shong sa ha ka kynhun Myntri ban ai ïa ka jingmynjur,” u la ong da kaba bynrap ba kane kan dei ka sienjam kaba khraw bad kaba radbah bha.
Haba bynrap pat halor ka jingkren jong ka Myntri hynin ka sngi, u Myntri Rangbah u la kubur ba kadei ka polisi ha kylleng ka ri ba kano kano ka jylla kaba la don ïa ka medical college lajong kim ju ïoh shuh ïa ka bhah pule doktor na kiwei pat ki jylla.