Nongstoiñ, Nailar 23: Ka Kashari Special Judge (POCSO) jong ka West Khasi Hills, ka la hukum ban set along 10 snem ïa u briew uba donkti ban leh be-ijot ïa kawei ka Khynnah.
U Superintendent of Police jong ka West Khasi Hills District, u la pyntip ba ki Pulit ki la ïoh pdiang ïa kawei ka jingujor ejahar, ha kaba kawei ka khynnah kynthei ba dang rit ka rta ka la shah thombor bad ïa kane ka kam thombor, la kynnoh ba leh da u Richard Kharbani bad u Sheldar Syiemlieh .
Ki Pulit ki la registar case pyrshah ïa kine ki arngut hapoh Nongstoiñ Police Station bad pyngnat hapoh ka kyndon 3(a)/4 bad ïa ka jingtohkit la bynset ha ka Women Police SI FK Marak, jong ka Nongstoiñ Women Police Station. Ïa kane ka Case la pynngat kyndon da ka Investigating Officer hapoh ka kyndon 5(1)/6 POCSO Act.
Hynrei dei tad ha ka 18 tarik u Nailar 2023, ka Kashari Special Judge (POCSO) Nongstoiñ, hadien ba la pynshong nongrim bad bishar bniah na ki sakhi satar ba la lap ha ka jingtohkit, la rai pynrem ïa u Sheldar Syiemlieh da kaba set along kaba haduh 10 snem kynthih ryngkat ka jingdaiñ kuna T. 20,000 hajar katkum ka kyndon 6 jong ka POCSO Act.
La ïathuh ba ïa u Richard Kharbani la pyllait noh na kane ka case namar la shem ba um ïa don bynta ha kane ka kam runar.
