Shillong, Nailar 23 : Ka Committee on Women Empowerment jong ka ïingdorbar thawaiñ ka jylla ka la shong bishar kam halor ki jingjia kiba ïadei bad ki jingshah thombor ki longkmie bad ki khynnah kynthei ha East Jaiñtia Hills bad West Jaiñtia Hills Districts ha ka 21 bad 22 tarik mynta u bnai.
Ka Chairperson jongka Committee, ka Kong Santa Mary Shylla, ka la lum ïa katei ka jingïalang bishar kam ha kaba la ïadonlang ki dkhot kiba dei ki MLA kiba kynthup ïa ka Miani D Shira, Bah Adelbert Nongrum, Bah Gabriel Wahlang MLA, u Marthon J. Sangma MLA bad u Bah Mathew B. Kurbah.
Haba ïakren bad ki nongthoh khubor, ka Chairperson ka Committee ka la ban jur ba dei ban ai ïa ka jingbishar kaba hok bad kaba kloi khamtam eh ha kaba ïadei bad ki POCSO Case.
Ka la ong, ba kala bthah ïa ki bor pynïaid distrik ba ki dei ban pynthikna ba dei ban pynbiang ïa ki jingdonkam baroh ïa ki lanot.
Ka Kong Shylla ka la ong ba ka Committee kan sa ïai buddien halor kitei ki jingjia bad kan sa pynlong ruh ïa kum kitei ki jingïalang ha kiwei pat ki district jong ka jylla.
ïa ka jingïalang ha ka East Jaintia Hills la pynlong ha DC office, Khliehriat ha kaba u Deputy Commissioner ka East Jaintia Hills u Abhilash Baranwal, u Addl. SP ka East Jaintia Hills bah Banraplang Jyrwa, bad kiwei kiwei ki heh ophisar ki la wan ban ïashimbynta haka jingïalang.
ïa ka jingïalang ha West Jaintia Hills la pynlong ha Jowai ha kaba u Deputy Commissioner ka West Jaintia Hills u Bah BS Sohliya, u SP ka WJH Bah Chemphang Syrti, u Dy SP Bah CW Lyngdoh bad kiwei kiwei ki heh ophisar kila wan iashimbynta ha ka jingïalang.
Ka Committee ka la leit ruh ban jurip ïa ka One Stop Centre kaba don ha Khliehriat ha ka Lah Sngi U Blei.
