Shillong, Nailar 23 : U Myntri Rangbah ka jylla u Conrad K Sangma mynta ka Sngi Balang u la ong ki bor pulit ka jylla ki la ïoh ban kyrwit bad jynrat ha ka por kaba biang eh ïa ka seng thymmai National Liberation Council of Nongkyndong (NLCN).
“ Hooid ki don ki briew kiba pyrshang ban ïalum lang bad thaw ïa kane ka seng bad ban ïoh ka jingpyntbit ruh hynrei ka jingtrei shitom ki pulit ka la long kaba seisoh namar ki la ïoh ban khyrwit bad jynrat ïa kane ka seng ha ka por kaba dei da ka jingïoh kem ïa kumba 10 ngut ki briew kiba kam ba ki dei ki nongïalam kane ka seng” ong u Conrad K Sangma.
U la ong ba kim pat da ïoh ban thaw pynskhem bha ïa ka NLCN. “ Ka dei ka kynhun jong ki briew kiba pyrshang ban thaw ïa kane ka seng hynrei kumba nga la ong da ka jingïoh jingtip ki bor pulit ha ka por kaba biang bad leh ïa ka kam kumta ka jingthmu jong ki ka la pulom noh namar kita kiba kam ba ki dei ki nongïalam ba hakhmat eh ki la ngat lut ha shrip ki pulit” ong biang u Myntri Rangbah.
Ha ka taiew ba la dep hadien ba ki pulit ki la lap ksai ïa kane ka seng ki la ïoh ban kem ia 7 ngut ki dkhot jongka kynthup ïa uwei u khynnah skul nangne na East Khasi Hills.
Kine kiba shah kem ki kynthuup ïa ki san ngut ki nongïalam kiba kam ba ki bat ïa ka kam Chairman, Commander-in-Chief, General Secretary , Area Commander West Khasi Hills bad Area Commander Jaintia Hills. Nalor kane la ïoh kem ruh ïa ka nongpynrung dkhot, kiba thoh ïa ki kyrteng bad 3 ngut kiwei pat ki dkhot.
Ka NLCN ka la ïateh kular ba ki seng kaikhlaw na Nagaland ban ïoh phah leit pyntbit ïa ki dkhot jongka bad ïa ka kynhun ba nyngkong eh la thmu ban phah ha ka 17 tarik mynta u bnai hynrei shwa kane ki la ngat noh ha shrip ki pulit.
ïa kane ka seng la thaw ha kane ka Eastern Range kata Khasi bad Jaintia Hills da ki samla da ka jingthmu ban ïaleh pyrshah ïa ka sorkar, ban leh ïa ki kam pyntriem, ban thied ïa ki tiar ïaleh, ban dawa pisa, ban pynrung dkhot bad leh ki kam rahbor bad kiwei kiwei ki kam pyntriem hapoh ka jylla.
ïa kine kiba la kem la pynngat ha ka kyndon aiñ IPC bad UAPA.Ki pulit hadien ba la ïoh kem ki la pynlong ka jingtohkit kaba bniah bad leit khynra ruh ïa ki jaka ba ki sah bad ïoh kurup shibun ki kot ki sla kynthup ïa ka register ba thoh kyrteng ïa ki 100 ngut ki dkhot. Kane ka seng ka thmu ban pynrung dkhot haduh 1500 ngut ki ban ïoh jinghikai ha Nagaland. Ki dang shu sdang ban pynrung dkhot dang mynta ar bnai ei ei tangba ïa kane ka seng ki la ïathaw naduh u snem ba la dep. Ka jingthmu jongki ka long ban pynkhlaiñ ïa kane ka seng palat ban ïa ka HNLC.
