Shillong, Nailar 23: Kum ka dak ban kynmaw burom ïa ka jing shah siat ïap jong u Bah Balajied Dkhar ha ka kti ki pulit ha Nongshilliang Shillong ha ka 23 tarik u Nailar ha ka snem 2000 u ba dei ruh u dkhot barim Jong ka Hynniewtrep National Leberation Council HNLC na ka liang ka Hynniewtrep National youth front HNYF mynta ka sngi ryngkat kiba haïing sem jong u bah Balajied Dkhar bam kwai ha dwar u Blei ki leit ban buh syntiew ha u lum jingtep jong u, uba don ha u lumjingtep kaba Balang U Blei ha Qualapaty shillong
Haba kren sha ki ladpathai khubor na ka liang u president ka HNYF East khasi hill u bah Bless Dkhar u la ong ba ka jing wan buh syntiew jong ka seng mynta ka sngi kaba dei ka sngi ïap u dkhot ka HNLC ka dei katkum ka jingbthah u President Rangbah ka seng u Bah Sadon Blah u ba dei ruh u ksiang ka HNLC
Shuh shuh haba kren na ka liang u kpa jong u, u bah Ejar u la ong ba ka jingshah siat ïap u khun ka dei ha ka por ba u dang don 20 snem ka rta
Na ka liang u Bah Ejar u la kyntait ba ka jingshah siat ïap jong u khun jong u (Balajied) ha ki pulit kadei namar ba don ka jingïasiat ba mar kylliang “Ka jingong ba ïasiat markylliang kam dei namar katkum ka kaiphod jong ka Commission ruh la kdew ba kadei kaba shu thok (fake),” u la ong.
U Bah ES Ajar uba dei uwei na ki Rangbah uba la don bynta ruh naduh ka por ba ïakhih Hill State ban pynïoh ïa ka jylla lajong, u la ong ba ha ka jingïohi jong u, ka sorkar ha ka juk mynshwa bad mynta ka la ïapher bha.
“Ki khun ki kti jong ka jaidbynriew jong ngi mynta, ki ïaleh pyrshah ïa ka sorkar, nga shem ba ka daw kadei namar jong ka sorkar ‘Ka sla dieng kan nym khih khlem beh ka lyer’ bad kidei ki bor synshar kiba pynlong ïa ka daw baroh. Wat haduh mynta ym donkam shuh ban sakhi nga ïohi lut baroh kaei kaba la jia ha ka ri jong ngi,” ong u kpa jong u bah Balajied.
U la ong ba ha ka jingshisha ka sorkar kadei ka kmie bad haba ki khun ki leh runar kidei ban ïaleh ban pynkylla ym ban pynïap. Ha ka por ba ïakhun Hills State, nga long u Volunteer ha kane ka jingïakhih bad ha Khyndailad ngi ïashad, ki pulit kim ïaleh eiei.
Une u Rangbah u la ong ba mynshwa lada leh bakla u Myntri sorkar ne uno uno u nongmihkhmat u lehrain bad u la rai hi ban hiar shuki ïalade, hynrei ha kane ka juk mynta lada u leh bakla katno katno ruh u pyneh beit.
Lah ban kdew hangne ba u Balajied u la shah siat ïap lang ryngkat u Samla Dapbiang Shullai bad u Samla Rocky Shylla, ki dkhot ka KSU.
