Nongstoiñ, Nailar, 02: Ka seng WKSU Central Body ha ka sngi hat majai ka la leit ban kyntur ïa u Deputy Commissioner halor ka jinghiar bad ka jingduna jong ka thaiñ West Khasi Hills District katkum ka report ba lah mih na ka NFHS & NITI Aayong 2015-16.
Katkum ka jingïakren jong ka seng bad u DC, na ka liang u DC u la pynpaw ba u la shimkhia ïa kane ka kam bad u la leit buddien ruh dalade ïa ki jaka kiba dang sah dien.
Na ka liang u DC u lah ai ka jingpynshai ba ka daw kaba pynkylla long ïa ka District ban sah dien, ka dei ka jingduna ha ka liang ka pule puthi, ka koit ka khiah ki longkmie kha khunlung, ki lynti ki syngkieng, ka jingduna ha ki network bad ka jingduna ban link ïa u Adhaar card bad kiwei kiwei.
U DC u la ai ka jingpynshai ba ka jingduna ban link ïa u Adhaar card ka ai lad ïa ka jingbamsap ha ki shnong ki thaw, ha ki tnad sorkar bad ha kiwei kiwei.
“Ngi ka seng ngi wer ïa ki paidbah ba kin sngewbha ban link ïa u Adhaar card lane ban apply ïa u Adhaar card, khnang ba shibun ki jingmyntoi jong ki scheme na ka sorkar kmie bad ka sorkar jylla kin sah wan ha ki ïing ha sem jong ki nongshong jong ka thaiñ”, ong u Mondaystar Lyngdoh General Secretary ka seng.
U la ong ruh, “Ka thaiñ West Khasi Hills kan sah kiew irat biang khamtam ha ka roi ka par bad ha ka ïoh ka kot lada ki paidbah ki ïatreilang”, ong u Bah Monday dad bynrap, “Ha kaba ïadei bad kane ka mat ka seng kan nang ïai buddien na ka por sha ka por ban ïatreilang bad ki bor sorkar na bynta ka jingbha jong ki paidbah.”
