Sngewnguh u nongshna ka jingrwai kongdeng Kongnah ïa ka VPP ba pynkup burom

Shillong, Lber 19: U Nongthaw ka jingrwai Kongdeng Kongnah ka jingrwai elekshon jong ka Voice of the People Party (VPP) Bah Smiling F Mylliemngap u la ong ba ka ka jingpynkup burom jong ka VP ïa u kum u nongshna ïa kane ka jingrwai bad ïa u nongrwai ka jingrwai u Samla Skhem Myrboh ka dei ka jingai burom kaba khraw jong ka party ïa u kaba um pat ju ïoh koit na kiwei pat ki party.
Ha ka jingïakren bad u Mawphor u Bah Smiling u la ong ba ha ka jingshna jingrwai jong u kaba la palat da ki spah tylli ki jingrwai elekshon dei tang ka VPP kaba ai burom shisha ïa u hadien ba kut ka elekshon.
“Kum kane ka jingshah pynkup burom da ka party hakhmat ki paidbah hadien ba ka party ka la jop ïa ka elekshon ïa nga u nongthaw jingrwai bad u ïa u Skhem kum u nongrwai kan dei ka sien kaba nyngkong eh wat la da ki bun ngut ki kyrtong bad ki party kiba nga la dep shna jingrwai, ym dei pat ban ong ba kane ka jingkren jong ka ka thew ba nga kwah burom hynrei ka pyni ïa ka jingdon akor jong ka party VPP,” u la ong.
Haba kylli kumno u poi shna ïa kane ka jingrwai u Bah SF Mylliemngap u la ong, “hadien ba ka don ka jingkyrpad na ki nongtrei ka party na Nongkrem ba ngan shna jingrwai nga leit mih ha iing i Bah Ardent ban ïakren bad dei da ka jingai jingbit jong i Bah Ardent ba ka mih pyrthei kane ka jingrwai.”
U la ong ruh ba ka jingshna jong u ïa kane ka jingrwai ka shipor ïa u tang kumba 20 minit ne duna.
“Ka burom ka dei ïa u Blei uba la ai ka sap bad nga don ka jingthmu ban thaw jingrwai katba nga dang lah khnang ban lah ba ai ka khubor lyngba ki kyntien jingrwai,” u la ong.
U la ïathuh ruh ba naduh ka khyllipmat kaba sdang ba u thaw ïa kane ka jingrwai ka la don ka maïan Blei kaba la pynpaw lupa ba kane ka jingrwai kan sawa kylleng ka ri.
Haba kylli ïa ka daw aiu kaba u sngewthuh kaba pynlong ïa kane ka jingrwai ba kan ïaid dor, ‘kam dei tang bang ka sur ne ka kyntien jingrwai hynrei namar ki paidbha ki la kwah jingkylla bad ki phai khmat sha ka VPP ka dei ka daw kaba kogsan eh ba kane ka jingrwai ka ïaid ïew bha,” la jubab u Bah Smiling
Haba kylli la u don ne em ka jingsngew hun mynsiem ba ka VPP ka lah ban jop haduh saw ngut ki MLA lyngba ka jingrwai jong u, u Bah Smiling u la ong ba ka jingjop ki kyrtong ka VPP kam dei eh tang na ka jingrwai hynrei ka don kiwei pat ki daw kiba kham ha khmat.
“kam dei ban ong ba ka jingjop ki saw ngut ka dei na ka jingrwai hynrei namar ki paidbah ki la kwah jingkylla bad lehse da ka jingmih sa ka jingrwai ka la ïarap ïa ka VPP bad ong beit ka jingjop tang na ka daw ka jingrwai ka long kaba bakla,” la ong u Bah Smiling.
Haba kylli ïa ka jingrwai elekshon kaba u la shna kaba ïaid ïew kum ka jingrwai Kongdeng Kongnah u Bah Smiling u la ïathuh ba ba kawei ka jingrwai kaba ïaid ïew ka dei ka jingrwai “Ko Nongmih Khmat Ko Nongmih Khmut” kaba u la shna na bynta u Bah HS Shylla ha ka elekshon MLA 2018.
U la ïathuh ruh ba lada kheiñ lang ïa ki jingrwai kaba u la dep ban shna kiba kynthup naduh ka jingrwai Gospel, ka jingrwai elekshon, ka jingrwai ki sengkur bad ki klob lehkai phutbol bad kiwei kiwei kim duna shuh ïa ka 8 hajar tylli.
Lah ban kdew hangne ba ka jingrwai elekshon jong ka VPP ka Kongdeng Kongnah kaba la thaw da u Bah Smiling bad rwai da u Samla Skhem Myrboh bad ïa ka jingput jingtem la pynbiang da u Samla M Nongsteng ka dei ka jingrwai elekshon kaba ïaid ïew tam ha kaba la sakhi naduh ki khynnah khynlung, ki tymmen ki san ki samla samhoi ki la kyndeh mysiem ïa kane ka jingrwai ha kaba wat ki briew kiba na kiwei ki ri bad ki jylla wat la kim sngewthuh ïa ka jingmut ki kyntien hynrei ka don ka jingsngew tynnad bad sngew shoh mynsiem haba tem ïa kane ka jingrwai.