Dei ba shet kylla da ki seng riewlum hi ba ngim ïoh sorkar ban ïalam da ki seng riewlum: Ardent
Ngin sei kyrtong ha baroh 29 seat ha ka elekshon sha KHADC bad JHADC
Shillong, Lber 19: U President ka Voice of the People Party (VPP) u Bah Ardent Miller Basaïawmoit ha ka sngi Saitjaiñ u la ong ba ka jingwan biang ka sorkar NPP-BJP ha ka kylla kaba ar ka dei namar ka jingshet kylla jong ki seng riewlum ïa ka jingthmu ban thaw sorkar ban ïalam da ki seng riewlum.
“Ngi la rai ban ai jingkyrshan na bar jong ka sorkar ban ïalam da ki seng riewlum lada kim pdiang ïa ki kyndon kiba ngi buh hynrei kane ka jingthmu jong ngi ka pulom namar la shet kylla ym tang ïa ka VPP hynrei kahmtam eh ïa ki paidbah ka jylla,” ong u Bah Ardent ha ka jingkren ha Madan polo.
U la ong ruh ba ka jingshet kylla ki seng riewlum ka la long pynban ka kabu ïa ka VPP namar mynta ka la dei sa tang ma ka ka seng riewlum kaba ai ïa ki kjatsngi jingkyrmen ïa ki paidbah ka jylla.
“Hadien ka jingsha shet kylla ka VPP ka la shim ïa ka jaka jong ki seng riewlum kaba ki paidbah ki don jingkyrmen ban pynurlong ïa ki jingangud jong ki,” u la ong.
U Bah Ardent ha ka jingkren jog u u la ong ruh ba da kane ka jingshah shet kylla ka pynlong ban shim ïa ka rai ban trei shitom khnang ban ïoh synshar marwei ha u 2028.
“Nangne sha khmat ngin trei shitom ban pynïar ïa ka party ha kylleng ki jaka khnang ba ka jinganud ban ïoh synshar marwei ha u 2028 kan seisoh,” u la ong.
“Phi ïohi ba u President ka NPP u ong ba ka VPP kan ktah ïa ka NPP tang ha Khasi Hills bad ha ka elekshon sha ka iingdorbar jong ka Khasi Hills Autonomous District Council (KHADC) hynrei nga kwah ban ong ïa phi ba ka party kan pynkhlaiñ ha kine ki ar lai bnai ha Jaintia Hills bad ngi kyrmen skhem ba ngin lehbha ha ka elskhon jied nongthaw aiñ sha ka iingdorbar ka Jaintïa Hills Autonomous District Council (KHADC), bad kumba long mynta wat la lehse ngim lah ban sei kyrtong bun ha kane ka elekshon MLA hynrei ka VPP ka khlaiñ ha kaylleng ki jaka kynthup ha Jaintia Hills bad man ki jaka ba ngim sei kyrtong ki briew ki phone beit ïa ngi bad ki shu ong beit Bah Ardent ai Prah shane bad kane ka pyni ba ki paidbah ki don ka jingthrang ïa ka VPP ha kylleng ka ri,” u la ong.