Sngewkmen ka Synjuk ki Nongïalam Shnong halor ka jingïoh jingithuh na ka KHADC

Shillong, K’ Lyngkot 18: U Nongïalam jong ka Synjuk ki nongïalam Shnong u Bah R O Wahlang ha ka jingïalang Dorbar Iktiar Paidbah u la pynkynmaw ba dei u (L) H S Shylla ha u snem 2018 u la pynlong aiñ ïa ka lineage act hynrei kane ka jingmynjur kam pat shym la hun satia.
“Hynrei hadien ba la lum ïa ka jingïalang kaba 42 tylli ki kur kane ka rukom kheiñ kur kheiñ jait mynta la ithuh da ka aiñ, kaba kynthup ruh ïa ka jingithuh ïa ki seng kur bad kane ka aiñ thymmai la donkam ïa ki kur baroh ban pynrung kyrteng ïa baroh ki seng kur hapoh ka KHADC,” ong u Bah Wahlang.
U bynrap ruh da kaba ong. “Mynta ka la don ka jingithuh da ka aiñ ïa ki dorbar kur bad ki seng bapher bapher bad kin sa don ki kyndon halor kane ka bynta ha kaba ïadei bad ki rukom treikam jong ki.”
Haba pynpaw ïa ka jingkmen halor ka jingshim khia jong ka KHADC lyngba u CEM ba mynta u Bah Pynïaid Sing Syiem bad u MDC ka Sohra u Bah T W Chyne kane ka aiñ ka la kdup ïa baroh ki seng kiba don ha ki shnong bapher bapher ba kin treikam lyngba ka jingithuh da ka aiñ bad ka jingdonkam ban ithuh noh ïa ki shnong, ki seng longkmie, ki seng samla bad kiwei.
“Halor kane ngi donkam ban ïatreilang bad ka KHADC halor kane ka bynta khnang ba kiei kiei ki rai ba la shim da ki seng bapher bapher yn lah ban ithuh noh da ka aiñ,” ong u Bah Wahlang.