Sngewkhia u Myntri ka tnad pule puthi ba ïabeh ki khynnah skul ban wan College tang ha sor

Shillong, Iaiong 7 : U Myntri ka tnad Pule Puthi u Bah Lahkmen Rymbui ula pynpaw ka jingbym sngewtynnad halor ka jingïabeh ki samla pule ban wan sha sor na ka bynta ki jingpule kiba shajrong (higher studies) watla ki don ki stream ne lain pule ha ki college kiba don marjan bad ki.
“Kane ka dei kaba pynduh mynsiem ïa ngi kum ka Sorkar Jylla” ong u Bah Rymbui haba ïakren bad ki nongthoh khubor ha ka sngi Ba-ar. U Bah Rymbui ula kyntu ïa ki khynnah skul ba kin pyndonkam ïa ki college ba don marjan bad ki, haba ai nuksa kum ia ka Khraw Sing College ha Mawphlang, Patharkhmah bad Nongtalang.
“Ngi la bei pisa kumta, sngewbha pyndonkam ïa kine ki jaka pule na ka bynta ki jingpule jong phi” ula kyntu.
U Myntri ula ban jur ba ki jingbei pisa ha ka pule dangle ka dei kaba wan na ka pla tyngka ka Sorkar, ym ka song pisa shimet.
“Shisien ba ngi bei pisa, kam dei satia na ka pla u Bah Rymbui, ka dei na ka pla tyngka ka Jylla” ula ong haba maham ba ka jingkiar ïa ki college ba marjan ka lah ban lam sha ka jingtheh ïa ka pisa tyngka tang ha ki katto katne ki jaka sor.