Shillong, Nailar 26: Kiba bun ki Samla ba trei Nurse shabar jylla ki la pynpaw ka jingsngewkhia kaba jur ba kim ïoh lad ban trei ha la ka jong ka jylla bad ym tang ba kim ïoh lad ban trei, hynrei wat ban aplai ruh kim ïoh.
Kane ka long hadien ba ka Directorate of Health Services (DHS) ka la pynmih ïa ka Advertisement ban khot aplikeshon na ka bynta ka kam Staff Nurse (GNM) na ka bynta 164 tylli ki Post bad 78 tylli na ka bynta ka kam ANM. Ka jingaplai na ka bynta kine ki kam ka la plie naduh ka 5 tarik mynta u bnai bad kan kut ha ka 5 tarik u bnai ban wan.
Ki nongtrei Nurse kiba trei shabar jylla ki la ïathuh ba, katkum kane ka jingpynbna ne ka advertisement la bthah ba kiba aplai kidei ban long tang kito kiba la register bad ka Meghalaya Nursing Council (MNC).
Kiba trei shabar ki ïathuh ba haba ki trei shabar jylla ruh ki hap ban register bad ki jylla ba ki trei, kaba mut ki hap iehnoh ne resign na ka kam ba ki la trei. Te lada ki aplai sha Meghalaya ka mut ki hap ban cancel noh ïa ka registration bad ki jylla ba ki trei. Hynrei kam long kaba suk ïa ki ba kin cancel noh bad ka registration ba ki trei bad ban register ka MNC, namar lada kim ïoh na kane ka kam kaba ki aplai ha ka jylla la jong, shaei pat kin trei.
“Ngi la wan trei shabar jylla namar ba hadien ba ngi la pass ïa ka training, ngim ïoh kam ha jylla la jong bad haba ngi trei shabar jylla ngin hap ban register tang ha ka jylla ba ngi trei”, la ong iwei na kiba trei Nurse shabar jylla.
“Lada ki resign bad aplai noh sha jylla la jong, da ngim ïoh pat ïa ka kam ba ngi aplai ngin trei shaei pat”, la ong sa kiwei pat, da kaba pynpaw ka jingpyrshah ba ka tnad ka koit ka khiah ka phah register bad ka MNC. “Lada ngi la trei te sngewdei ban gin regisater. Mynta ba ngim pat trei bad ka DHS kumno ngin register bad ka MNC”, ki la ong.
