Shillong, Nailar, 26: Ka ïing ka sem, ki khun ki pyrsa jong u Syiem ka Hima Maharam u Pa’iem Niandro Syiemiong, ki la pynpaw ïa ka jingsngewdiaw bad ka jingsngewkhia ïa ka jingleh ba khlem pyrkhat jong ki riewshim kabu ha ka miet 18 tarik, Nailar 2025 kiba la tah ïa kiba bun ki jingthoh pyrshah ïa u Syiem ba la wah ha ki kynroh jong ka Kashari ha Mawkyrwat.
Ha u kyrwoh, la ong, “kum ka ïing ka sem ngim don eiei ban tuklar ïa kano kano ka kam jong u Syiem bad ka Dorbar Hima. Hynrei kaba ngi sngewdiaw ka long ba hapdeng kita ki jingthoh pyrshah ka don kawei kaba ong, “U Syiem Maharam nyngkong u ai tnga mynder shuwa ïa ka khun, mynta u tyrwa die sa ïa ka hima”, kaba la ktah shibun ïa ka burom bad ka i-jot jong ka ïing ka sem baroh kawei.”
“Kane ka pyni ym ïa ka mynsiem sngewkhia ba shisha ïa ki mat jong ka jingbha lang hynrei pynban ïa ka mynsiem kput shimet kaba mih na ka dohnud kaba la duh ka jingïatip lem. Lada kane ka dei ka jingleh jong kano kano ka seng, ka pyni ïa ka jingbymdon ka jingïalam kaba shemphang ban pynïapher ïa kaba dei bad kaba lait. Lada ka ïai long ha kane ka dur kan wanrah pynban ïa ka jingsngewduh jingshaniah wat ïa ki kam bad ki jingthmu ba bha jong kano kano ka seng,” la pynpaw ka iing ka sem jong u Syiem.
Haba maham ïa kino kino ki riewshim kabu bad ïa ki seng kiba donkti, ka ïing ka sem u Syiem ka la ong, “ka jingtah poster ha Kashari ha kane ka rukom kam dei shuh ka sien ba nyngkong. Mynshuwa ruh ka la jia kumjuh ha u bnai Nailur, 2021 ba la thoh ïa ki ktien kiba ktah ym tang ïa u Syiem bad ka Hima hynrei kumjuh wat ïa ka ïing ka sem,” bad bynrap, “kumta, kum ka ïing ka sem ngi la rai ba nangne shakhmat ngin hap ban buddien ïa kaba kum kane ka jingleh jong ki riewsniew bad riewshim kabu kiba la leh ïa kane ka kam, ki bym shym la nud ruh ban soi kyrteng ha ki poster ba ki la thoh.”
