Khliehriat iaiong 14 : Ka surok National Highway ha Umtyra, kaba don hajan ka Infiltration Vheck Point, East Jaiñtia Hills District, ka dei ka ba la twa lah slem bha ha kaba na ka liang ka national Highway Authority of India kam shym la shim khia ban maramot ïa kane ka bynta jong ka surok, kat haduh mynta ha kane ka bynta jong ka surok long ban ïaid tang kawei-kawei ka kali, kumta halor kane ka mat, na ka liang ka Federation of Khasi Jaiñtia and Garo People Khliehriat Circle, ka la leit ban buh da ka jingthoh hakhmat u Deputy Commissioner ka East Jaiñtia Hills District.
Katkum katei ka shithi, ba la soi da u President jong ka FKJGP Khliehriat Circle, u bah Michal Chyrmang, la pynpaw ba ka jingtwa jong katei ka surok ka dei naduh u snem 2021 ha kaba na ka liang ka NHAI kam shym la shim khia ban maramot kat haduh mynta bad kane ka ju wanrah ruh ïa ka jingdheng kali bad ka buh jingma ruh ïa ki nongleit nongwan.
Na ka liang ka seng ka la kyrpad ïa u Deputy Commissioner ba un sngewbha ban shim khia lem ban leh eiei halor kane ba ka NHAI kan pynkloi noh ban maramot ïa katei ka surok ba la twa.
La ong ruh ba ha ka jingïakynduh ki nongïalam bad ki dkhot jong ka seng, na ka liang u Deputy Commissioner, u Abhilash Banarwal, IAS, u la kular ba un shim khia ïa kane, ha kajuh ka por ka seng ka ka pynshai ruh ba lada na ka liang ka NHAI kam lah abn leh eiei, ka seng kan sa shim da kawei pat ka lynti ka ban long na ka bynta ka jingbit jingbiang jong ki paidbah nongleit nongwan.
