Shillong, Nohprah, 01: U Nongïalam ka Liang Pyrshah u Mukul Sangma ha ka sngi Palei u la pynpaw ka jingsngewskhem ba ka All India Trinamool Congress (TMC) kan jop lut ha baroh ki Constituency ha ka jingïakhun ïa ka elekshon sha ka Ingdorbar Thawaiñ ka ban sa long ha u snem 2023 ha ka Jylla.
“Kat shaba ngi leit (ban sei kyrtong) sngewbha ban kynmaw ba ngin jop beit ïa kito ki Seat,” la ong u Sangma ha ka jingïakren bad ki lad pathai khubor.
Ka Party haduh mynta kam pat pynbna satia katno tylli ki Seat kan ïakhun ha ka elekshon sha ka Ingdorbar Thawaiñ ka ban sa long ha u snem 2023.
Dang khyndiat sngi, u MLA ka AITC na Mawsynram u Bah Himalaya M Shangpliang u dei uwei napdeng ki lai ngut ki MLA ba la resaiñ kum u dkhot jong ka Meghalaya Legislative Assembly ha kaba u la pynkhreh ban pynïasoh noh ïalade bad ka BJP.
Da kaba pynpaw ba um sngew phylla ïa ka jingphet jong u Bah Shangpliang, u Sangma u la ong, “ngim shym la pynmih ïa ka kyrteng hynrei ngi tip mano ban ryngkang. Kine ki dei kiba ju jia ha ka saiñpyrthei namarba shwa ban phet ki la dep shim rai lypa. Ngi tip. Namarkata, ngi don la ki jong ki rukom treikam kumno ban pynkhreh.”
U ong ba ka party ka ladep tip lypa ba ar ne lai ngut ki Sitting MLA kin sa phet ym tang na ka TMC hynrei wat na kiwei kiwei ruh ki party.
U la ong ruh ba ym baroh ki Sitting MLA kiba mynta kin jop ïa ka elekshon ha u snem 2023. “Ngi hap ban ïashai ba baroh ki Sitting MLA kin hap mad ïa ki jingshah tynjuh ban shah jied biang sa shisien. Kata ka dei ka jingshisha. Katno ngut na ki Sitting MLA kiba la shah rem ha u snem 2018 bad ha u snem 2013,” u la ong.
