Shillong, Nohprah, 01: Ka Meghalaya SSA School Association (MSSASA) ha ka Sngi Palei ka la dawa ïa ka Sorkar Jylla ba ka dei ban thung noh mardor ïa u Chairperson bad ïa ki dkhot jong ka Meghalaya State Education Commission (MSEC) bad ban pyntreikam noh kham kloi ïa kane ka Commission na ka bynta ban kyntiew ïa ka pule ka puthi ha ka jylla Meghalaya baroh kawei.
Ka Seng hapoh ka jingïalam jong u President u Bah Aristotle Rymbai ka la aiti da ka dorkhas ha u Symbud Myntri Rangbah ka Jylla u Bah Prestone Tynsong ban pynsngew ïa kane ka jingdawa.
Ha ka jingïakren bad ki lad pathai khubor u Bah Aristotle Rymbai u la ong ba kane ka jingdawa jong kane ka kynhun ki nonghikai skul SSA ka long hadien ba ka Sorkar ka la thaw ïa ka Meghalaya State Education Commission (MSEC) na ka bynta ban peit ïa ka jingeh jong ki nonghikai, jong ki skul bad ki Kolej ha kaba ki bor pynïaid skul kim donkam shuh ban leit pynsngew ïa ki jingdawa jong ki sha ka Sorkar hynrei ka Commission hi kan sa peit ïa ka jingeh kaba ki skul bad ki Kolej ki ïakynduh jingeh.
“Dei halor kane ka nongrim, ba ngi kwah ba ka Sorkar kan thung noh kham kloi ïa u Chairperson khnang ba ngin dup lah ban leit pynsngew ïa ki jingeh kiba kum ki nonghikai ki ju ïakynduh na ka por sha ka por ha kaba ïadei bad ka jingsiew tulop bad kiwei kiwei de ki jingdawa,” la bynrap u Bah Rymbai.
Une u nongïalam ka MSSASA ula pynpaw ka jingsngewnguh ïa ka Sorkar Jylla bad khamtam eh ïa u Myntri Rangbah u Conrad Kongkal Sangma halor ka jingshimkhia ban pynurlong ïa ka mat jingdawa ban thaw ïa ka Meghalaya State Education Commission (MSEC) khnang ban pynbha bad ban pynjanai ïa ka pule ka puthi ha ka jylla Meghalaya baroh kawei.
