Shwa ban wan ka elekshon MDC, pan jingkyrshan u Dr. Ricky Syngkon na ki paidbah ka East Jaiñtia

Khliehriat, Naitung, 12: U Dr Ricky.A. Syngkon uba dei u MP jong jong ka Shillong Parliamentary, u MLA na Mawlai u Bah Brightstarwell Marbaniang mynta ka sngi ki la hiar sha Khliehriat bad la pynlong ïa ka jingïalang ai khublei ïa ki paidbah ha Khliehriat West Community Hall, la ïa don ryngkat lang ruh u President ka VPP na Jaiñtia u bah Damewanhi Rymbai lem bad kiwei pat ki nongïalam bad ki dkhot ka VPP na East Jaiñtia Hills District.
Haba kren sha ki paidbah u Dr Ricky Syngkon u la pynpaw ka jingsngewnguh bad ai khublei ïa ki paidbah jong ka district bad na ri lum Jaiñtia hi baroh kawei kiba la ai ka jingiatreilang bad ka party Voice of the People Party haduh ban wanrah ïa ka jingjop donburom jong u kyrtong ka VPP ha kane ka MP election ba la dep, ha kajuh ka por u la kren bad pashat ruh shibun kiei kiei kiba kum ka party ka iaid lynti ha ka jingshakri ïa ka ri, ka jaitbynriew bad ka jylla hi baroh kawei bad ong ruh dei tang ka jingiatreilang ryngkat bad ki paidbah kaba lah wanrah ïa ka jingkylla dur bad ka jingiaid lynti ka dang jngai ban poi sha ka thong.
“Ngin phai sha u Blei bad ngam artatien ba sa shien pat ngin iohi ïa ka burom jong ka ri bad ka jaitbynriew la ka long ha ka trei ka ktah la ka long ha ka koit ka khiah, ka pule puthi wat ka jinglong jingim hi” u la ong ruh ba u sngew khia haduh katta katta namar wat sha Delhi ruh ki tip shaphang ka jinghiar ka jaitbynriew ki tip ruh ïa ka jingjyllei u drok ha Meghalaya, kum u nongïalam u la ong ba da ka jingiashnohkti lang jong baroh ki paidabah yn sa lah ban pyndep hok ïala ka kamram, namar u nongïalam kum u shakri u dei u ban pynurlong ïa kaei kaba u iohi jngai hynrei ban poi sha kata yn nym lah lada khlem ka jingiasnohkti lang,” ong u Dr Syngkon ba bynrap ruh da kaba iawer lang ïa baroh nangne shakhmat ban ai ka jingiatreilang ha ka MDC bad MLA election ruh ki ban sa long.
“Kiei kiei kiba kjap ïa ngi to ngin ïa don bynta lang ba ngin ïa weng noh ïa ki ñiut ki ñier ngin ïa pynkhuid bad khnang ba ngin iohi keiñ ïa uta u symbai ba ngi la bet, saw ngut ha ka MLA uwei ha ka MP nga kyrmen ba uta u symbai ba ngi la bet un sei ïa ki dieng ki ban sei ïa ki soh tangba donkam ban iatreilang ban ïa poi lang sha ka thong bad ba ngin nym shet kylla ïa ka jaitbynriew”
Haba kren shaphang ki skim kiba wan u la iathuh ba ki MLA ha ka san snem ki ioh kumba T1337 lak tyngka, MP ki ioh kumba T2500 lak tangba kum u MP u hap ban iaphiah sha ki 36 tylli ki constituency, u MLA ha ka shi snem u ioh ym duna ïa ka T 250 lak tyngka bad nga ieh ha ka jingstad jong phi ruh ban sngewthuh ba nangno ruh ba phin dawa namar ka dei ka hok ka jongphi.
Ha kaba iadei bad ka dorkhas ba la ioh na ka VPP East Jaiñtia Hills Distriict u Dr Ricky Syngkong u la ong ba “ka shithi ne dorkhas kaba na EJHD kaba don shibun ki mat, ka don kawei ka mat kaba kren shaphang ka power grid, dang myn shi sngi nga dang leit mih sha powergrid namar nga tip ba kine ki company kiba don ha kari jong ngi ka dei ka kamram ka jong ki ban trei na ka bynta ka imlang ka sahlang namar ka jingioh jong ki ka dei kumba T500 klur sha neng ka jingioh bad ki dei ban ai biang sha ki paidbah lyngba ka tnat CSR, nga sngew kmen ba ki heh jong ka powergrid ki iathuh ruh bad ki la ong ïa nga ban leh eiei noh namar ka powergrid ka don ka pisa hynrei ym ju don ba wan pan te kumno kin ai, te kumta ki la ong ruh ba ki kwah ban iarap ha kaba iadei bad ka koit ka khiah, kumta nga la leit sha DHS bad iathuh ba ka don ka organisation kaba la kloi ban ai eiei na ka bynta ka koit ka khiah bad bthah ïa ka ophis u DHS ban ai ne pyntip ïa kiei kiba donkam kum ki tiar ki tar kumjuh ruh naduh ki dispensary Sub Center, ki PHC bad nga sngew ba kum u shakri kaei kaba donkam ka long ban trei hok bad ka jingmyntoi ka long ïa ki kynrad kiba dei ki paidbah, kum ki kynrad ruh ki dei ban long kiba iaishah namar kane ka dei tang ka jingsdang ka jingaiid lynti bad lada iohi ka jingduna ha u shakri phi dei ban longshlur ban ong”
“Ngam ju sngew marwei namar nga tip ba nga don ïa uta uba don bor baroh, kumta haba nga don ha Delhi nga pyrshang ban wad ki lad ban ioh kren bad nga la leit sha u Speaker bad nga iohlad ban kren, nga sngew shlur ba don uba iaid bad nga bad don sa sha dien ruh kiba kyrshan ïa nga ta ka daw nga ieng bad kren ïa ka jingshisha bad ka burom baroh ka long sha u Trai bad sha ka jaitbynriew”
‘Kum u sahki nga sngewtynnad ban trei ym ban kren bad nga pyrshang, kum ka jaitbynriew bad kum ka jylla ngi la iaid ïa ka lynti ym kata ka lynti ka ban ai ka jingkyrmen ïa ka lawei jong ki khun ki kti jongngi hynrei ngi iaid lynti ïa kine ki 52 tylli ki snem ka dei ka lynti kaba buh ïa ka jylla ka jong ngi ha ka kyrdan kaba sngewlehraiñ, ha ka kyrdan kaba sngewjahburom bad kum ka jaitbynriew tipbriew tipblei ngi long pat kata ka jylla kaba sha trai duh kam long kaba sngewtynnad, kumta ngi la mih da ka jingmut ba ngi hap ban leh eiei”
U la ai khublei ïa ki paidbah bad ong ruh ba khlem ki paidbah ki nongïalam kim lah leh eiei ruh bad kane ka dei ka lynti ka ban wanrah ïa ka jingkyrmen, u ai khublei ïa ki paidbah kiba la shim ïa ka rai rangbah ban pdiang bad jied ïa kane ka lynti bad kaba la ai ka jingjop ïa ka VPP.
U MLA na Mawlai, u bah Brightstarwell Marba-niang u la ong ba “Na ki 36 tylli consticy jong ka Shillong Seat Parliamentary, ka VPP ka jop na ki 32 tylli ki constituency bad kane ka paw ba haba u paidbah u sngewthuh ym don kano kano ka bym lah bad phi la jied ïa kane ka lynti phi ki paidbah iaishah bad ngi, ngin ïatreilang mynta ngi la don sa u MP ka kam jongngi ka la nang iaid tangba donkam ban iaishah, u MP un leit ban tynruh sha ki ministry bapher bapher ha Delhi bad da ka jingiatreilang ngin pynkylla dur ïa kane ka jylla, ka jingiaid lynti jong ngi kam dei kaba suk” u la iathuh ruh ïa ka jingiaid lynti ha ka por ba kum ki nongialam ki la leit kylleng ban pynsgewthuh ïa ki paidbah bad ki la sngewthuh ruh ïa ka sur jong u paidbah, u la ong ruh ba “kum ka jaitbynriew ngi la donkam ïa ka sur jong ka jaitbynriew hangtei ha Parliament bad sngewkmen ba ha kane ka kynti ba mynta ba i Dr Ricky Syngkon i la don, hooid kam dei kaba suk ban ioh ban kren hynrei ngi la iohsngew pat ïa ka sur ka jaitbynriew ha Parliament bad kane ka la rah ïa ka mynsiem bad ïa ka burom jong ka ri bad jaitbynriew, ngi la treishitom ha kane ka MP election bad kynduh ïa ki paidbah ngi la sngewthuh ruh ïa ka sur jong ki paidbah, nga ai khublei sngewnguh ïa ka thaiñ ri Pnar ba phi la pyni da ki kam ha kaba ki vote ki la tam ka na ri lum Jaiñtia ban pyni sha ka ri baroh kawei kane ka dei ka khubor ïa kiwei kiwei ruh ba kin phai khmat sha ri lum Jaiñtia bad East bad West bad ka jingwan jong ngi, ka jingkdew lynti jong ngi ka long kaba seisoh, nga kmen haduh katta katta ha kane ka result MP ba mynta ngi don ha ka party kaba don ïa ka jingiohijngai kaba ai mynsiem ïa ngi bad kane baroh ka dei ka jingieid jong u paidbah bad ka jingshaniah ïa ka party VPP”
Na ka liang u bah Damewanhi Rymbai u la ai u la ai khublei ia u Dr Ricky Syngkon bad ïa u bah Brightstarwell kiba la wan ban ai khublei ïa ki paidbah ka East Jaiñtia Hills District, u la pule bad pynsngew ruh ïa ka dorkhas ba la aiti ha u MP kaba la kyrpad ïa u MP ban peit ïa ka kam tih dewïong namar ba kum ka district ka khmihlynti namar ba ka long ka ja kpoh jong ki paidbah ka thaiñ bad bun kiba la shah ktah naduh ba khang ban tih dewïong, ban peit lem ruh ïa ka jingjot jingpra ka surok national highway 6, ban wadlad ban thaw ïa ka Land Custom Station (LCS) la ka dei ka Umkiang ne ha Kuliang namar kane ka thaiñ ka don bun ki mar pohkhyndew hynrei shem jingeh pat ban pynpoi ïa ki sha kiwei pat ki ri, kumjuh ruh ban peit ïa kikam ba iadei bad ka Power grid kaba don ha Khliehriat ha kaba bun kim tip ïa ki jingmyntoi ba wan na ka Powergrid la ha ka iohkam iohjam ne ha kino kino ki bynta, ban peit ruh ïa ka skul JNV kaba don ha Rymbai bad kiwei kiwei.
U bah Dame u la iathuh ruh ba “Na EJHD la ioh bun eh ka vote dei na Khliehriat constituency kaba la wanrah ïa ka burom na ka dong ka thaiñ bad ka ha ka jingïalam u Blei ka long baroh kaba lah, ka jingjop donburom ka party ngi ai burom sha u Blei kumjuh ruh sha u paidbah ba kyrshan met bad mynsiem”
La ïa don ryngkat lang ruh ka President VPP na Narpuh ka kong Deiwi Tongper lem bad ki dkhot kiba na ka thaiñ Narpuh lem bad shibun ki riew rangbah na ka thain East Jaiñtia Hills District.