Khynra ka KSU ha Wahkaji, lap 16 ngut ki nongbylla bar jylla bym don Work Permit

By Mawphor Editor On Jul 13, 2024

Mawkyrwat, ‘Naitung 12: Ka KSU South West Khasi Hills District ha ka sngi Thohdieng hapoh ka jingïalam jong u Environment bad Cultural Secretary u samla Plosborlin Kharjahrin ki la hiar sha shnong Wahkaji ban khynra Work Permit ïa ki nongtrei jong ka Company ba shna ïa ka surok Intermediate Lane na Nongstoiñ haduh Wahkaji.
Ha kane ka jingkhynra ka seng ka la lap ba ki don haduh 16 ngut ki jaitbynriew bym dei trai shnong kiba dei nabar jong ka jylla ki la shu wan rung tuh hapoh katei ka jaka khlem ka Work Permit kaba dei ka jingbit na bynta jong ki ban trei hapoh ka jylla Meghalaya.
Lah ban kdew ba kane ka jingkhynra ka long kum shibynta na ka bynta ka jingïasynrop lang bad ka KSU kaba don ban khynra Work Permit ha kylleng ki jaka jong ka Ri Khasi Jaiñtia.
Ka KSU ka la pynrem jur ïa ki bor sorkar kiba la leh matlah ban shah kylluid ïa ki bar jylla kiba wan rung kum ki nongbylla khlem ka Work Permit. Ka KSU, namarkata, ka ai ka jingmaham jur ruh ïa ki Company, ki Contractor ne ki ‘riew shimet kiba donkti ban pynrung tuh ïa ki bar jylla kum ki nongbylla khlem da tip ki wan naei bad khlem da don ruh iaka Work Permit.
Ha kajuh ka por ka seng nangne shakhmat, kan nang ïai bteng ban pyndep ïa la ka bynta da kaba kan pyntreikam hi ïa ka Work Permit bad ruh ïa ka Inner Line Permit (ILP) naba kum ka seng ka i ba ka sorkar jylla ka dang ïai long kuman halor kine kiei kiei.
“Ka Work Permit ka dei ban treikam ha baroh ki jaka trei la ka dei jong ki ‘riew shimet, ki contractor ne ki company bad lada kim biang ïa kita, ka seng nangne shakhmat kan nang ïai bteng ïa la ka kamram kampher lada kan poi ha kano kano ka bynta”, ong u bah Plosborlin Kharjahrin, Environment & Cultural Secretary.
Ym tang kata, ka seng kan nang ïai bteng ruh ban leh ïa kaba donkam katba ka Infiltration Directorate ne ki Labour Commissioner bad Labour Inspector kim pat lah ban treikam hok kumba ki dei ban treikam bad katba ki pulit ka tnad Infiltration kim pat lah ban pyndep hok ïa la ka kamram.