Na JACSO sha ka JACASE pynkylla kyrteng ka kynhun kaba ïakhun pyrshah ïa u drok

Mawkyrwat, ‘Naitung, 12: Ka Kynhun ki nongtrei-mon sngewbha ba kynthup KSU, SSSS, HYC, HITO, FKJGP, HANM, Seng Longkmie Mawkyrwat bad ka VDP Mawkyrwat, South West Khasi Hills District ha ka Press Conference mynta ka sngi ka 11 tarik u bnai ‘Naitung, 2024 da kawei na jingmut ki la ïa rai ban pynkylla noh ïa ka kyrteng jong ka kynhun namar ka don ka jingïatyngkhuh bad kiwei dei.
Haba kren sha ki lad pathai khubor u Secretary ka Joint Action Committee on Anti Social Elements (JACASE), u bah Plosborlin Kharjahrin u la ong ba hadien ba ki la don ka jingïatai ba sani halor ka jingbuh kyrteng jong ki kaba mynshwa ka dei ka Joint Action Committee on Social Organization (JACSO) hynre namar ki don ki jingïatyngkhuh hangne hangtai ki la rai da kawei ka sur ban pynkylla noh sha ka Joint Action Committee on Anti Social Elements (JACASE).
Kane ka Joint Action Committee on Anti Social Elements (JACASE) kan don ka jingtreikam kumjuh kumba long ha ka kyrteng jong ka Joint Action Committee on Social Organization (JACSO) ha kaba ka thong kaba hakhmat eh ka long ban rad-dyngkhong ïa u drok bad kiwei de ki kam sniew hapoh jong ka South West Khasi Hills District baroh kawei.
Ha kajuh hi ka sngi, na ka liang ka JACASE hapoh ka jingïalam jong u Chairman, u bah J.F. Iawphniaw ki la leit ban ïa kynduh ïa u Manager jong ka Sankur Rikynti Khaiñ Nonglang & Mawkyrwat Hat ban don ka jingïaphylliew jingmut halor kumno ban wanrah ka khuid ka suba hapoh ïew Mawkyrwat bad khamtam eh ban tehlakam ïa ki kam sniew.
Ha ka shithi ba ki la phah sha u Manager jong ka Sankur Rikynti Khaiñ Nonglang & Mawkyrwat Hat ki la buh ïa ki saw tylli ki mat ba kongsan kata ka long halor ki ïingjah hapoh ka ïew Mawkyrwat kiba kylla long ki ktem jong ka jingsniew ba bunjait ha kaba ki kyrpad bad kyntu un pyrkhat bad thaw ki lad ki lynti kumno ban pynbeit ïa kane ka bynta. Kawei de ka jing-i-donkam ban buh ïa ki bor jingpynshai (street light) ha ki jaka kiba dum bad bym shngaiñ.
Nangta, shuh shuh ban buh ki Pulit Sankur namar ka la don ka jing-i-donkam ba lada long kaba lah ka Sankur ka la dei ban buh pulit ïew katkum ka jingibit jong ka ban peit ngor ïa ki jingsniew bad ba khuid ba suba hapoh ïew bad kawei ka dei halor ka khuid ka suba namar kane ruh ka dei kawei ki mat kaba donkam eh ba un shimkhia bad kaba donkam ruh ïa ka jingïatreilang jong baroh ki paidbah.