Khnang ban ïada na ka jingïabit jong u khñiang jingpang COVID-19 ka tnat Pule Puthi ka la dei ban shim ïa kawei pat ka sienjam da kaba bthah ïa ki bor pynïaid skul lyngba ki Nonghikai skul ba kin pynkhreh ïa ka jingpynsngewthuh sha ki khynnah skul halor ki lad jingïada na ka jingïabit ïa kane ka jingpang khlam kaba la dkhat ïa kiba bun ki mynsiem briew ha kane ka jylla Meghalaya bad ha ka ri India baroh kawei.
Kane ka jingwan lynshop syndet jong kane ka jingpang khlam la lai sien kynthih ha ka ri India baroh kawei ka la buh ïa u dak jingkylli uba heh bha da kumno yn ïada ïalade. Ka Ministy of Health and Family Welfare jong ka Sorkar India ka la pynmih ïa ka jingbthah sha baroh ki tnat ka Koit Khiah jong ki Sorkar Jylla ban pynphriang ïa ki lad jingtip kiba pura khnang ban ïada na ka jingïabit ïa une u khniang jingpang. Lehse ki dang don bun ngut ki briew ki bym ngeit bad kiba dang ar tatien ïa une u khñiang jingpang ba la shu shna hi da u briew uba don ïa ka bor ban dkhat jubor ïa ka mynsiem jong ki briew.
Ka jinglong jingman haduh mynta hapoh kane ka Jylla Meghalaya kam pat long satia kaba shngaiñ namarba ka jingïabit jong ki briew ïa une u khñiang jingpang ka dang long da ki phew ngut manla ka sngi. Khlempep kin don ruh lehse hangne hangtai ba ki briew ki buhrieh ruh wat ïa ka jingpang namarba ki sheptieng ïohba ki hap ban leit sah sha ki Hospital ne sha ki jaka ba la buh kyrpang ban pynsah ïa ki nongpang da kaba pynïajngai na la ki bahaing hasem.
Khlempep, lada ka jingdon jong ki nongpang ka la sdang ban hiar suki pa suki, katkum ka jingpeit pyrman jong ka Sorkar, la i donkam wat ban pyllait noh nadong shad0ng namarba kane ka la ktah wat ïa ka ïoh ka kot bad ïa ka khih ka kamai jong kiba bun ki longïing kiba bylla mynstep bad thied khaw da miet.
Haba kdew biang ïa ka mat ba ka tnat Pule Puthi ka dei ban bthah ïa ki bor pynïaid skul ban pynsngewthuh paidbah ïa ki lad jingïada na ka jingïabit ïa u khñiang jingpang COVID-19, kaba kongsan eh ka long ba ki nonghikai hi dalade ki hap ban dem duriap ban tih bniah khyndiat ïa ki lad jingtip da ka jingïarap lem jong ka tnat ka Koit ka Khiah hynrei lym kumta ka jingpyrshang kan sa shu long leh nohei lada ka tnat jong ka Koit ka Khiah ka don shabar na ka lympung ïamir jingmut.
La ar snem tam ka Jylla Meghalaya ka la mad ïa ka jingwan lynshop jong kane ka jingpang khlam hynrei ki dang don bun byllai ki briew kiba dang shim sting ban sngewthuh haduh katno ki lad jingïada ki donkam shisha.
Hynrei kumba ka long, ka jingbud ryntih jong ki paidbah ïa ki jingbthah jong ka tnat ka Koit ka Khiah ka dei tang namarba ki bor synshar District lyngba ka jingbthah jong ka Sorkar Jylla, ki la pynmih da ka hukum ban leh da kaba tyngeh ïa kino kino kiba pynkheiñ aiñ.
Lada ka tnat Pule Puthi kan pynmih noh mardor ïa kane ka hukum ban bthah ïa ki skul, khlem pep kan long ka jingïada kaba khraw bha ïa ki khynnah skul, haba ka Sorkar ka la shim ïa ka rai ban ai jingbit na ka bynta ban plie biang ïa ki skul hapoh ka jylla.
Kum kine kiei kiei ki mat kiba kongsan tam, ka Sorkar ka la dei ban pyrkhat jngai lypa khlem da ap satia haduh ba ka um kan da poi haduh ryndang shwa ïohba kin khynnah skul kin hap ban shong iing biang da ki phew phew bnai kan long pat ka jingduhnong kaba khraw haduh katta katta ïa ka lawei jingpule ka jong ki bad ka jingpule Online kan ym ai jingïarap eiei ban pynroi ïa ka jingnang jingtip ba kynsai jong ka jingnang jingstad ka jong ki hadien habud