Shillong, Rymphang 15: Kum Shi bynta ban rakhe ïa ka jingkynjoh sha u mawmer ba 10 snem, ka seng HYC, CEC Central Body, lyngba ka tnat treikam Sport Cell kan pynlong ïa ka lympung phutbol kaba la tip da ka 1st Hynyñiewtrep Under-16 Football League 2024 kaba la khreh ban pynlong ha madan Malki.
Haba ai jingpynshai halor kane ka lympung ban sa pynlong, la pyntip ba ka seng kan pdiang haduh 32 tylli ki kynhun ki ban ïashimbynta , bad ka bai rung kan long 3000 tyngka na bynta kawei ka kynhun, la ong u Bah Franky- Chairman ka Sport Cell. U la ïathuh ruh ba ki kynhun ki lah ban register 18 ngut ki player hynrei haka por lehkai kan long tang 16 ngut.
Na ka liang jong ka seng, ka khmihlynti ba ym tang ki kynhun napoh East Khasi Hills ki ban wan ïashimbynta ha kane ka lympung hynrei na man ki district da kaba bynrap ba ka long ka jingkyrkhu na bynta jong ki bad ruh ïa ki samla ka jylla ban dang ïai kiew ha ka phutbol.
Ka seng kan sa kynjoh sha u Mawmer ba 10 Snem ha ka 17 Tarik u Naitung mynta u 2024, bad ïa kane ka lympung yn sdang naduh ka 30 tarik u Lber haduh 13 tarik Naitung. Ka lahduh kan ïohpdiang ïa ka tyngka kaba haduh 60,000 ryngkat ka trophy katba ka kynhun ba wan ba ar kan ïoh 30,000.
Nalor kine, ka seng kan ai ruh ïa ki khusnam sha ki player kiba kynsai ha kane ka lympung kiba kynthup naduh ki rangapkol, bad ruh ki player ba ïoh thep bun kol.
Ka tarik ba khadduh na bynta ki kynhun ne ki klob kiba kwah ban shimbynta ha kane ka lympung kan long ha ka 16 tarik u Lber.
