Sdang shongshit ka elekshon MP, hiar ka RDA ha Mawkyrwat ka VPP ha Nongstoiñ

Mawkyrwat/Nongstoiñ: Ka elekshon sha ka Lok Sabha, ka la sdang ban shongshit ha Meghalaya,wat lada ka Election Commission kam pat pynbna ïa ka tarik thep vote.
Ha ka Sngi Balang, ki lai tylli ki Kynhun Seng Riewlum, ka UDP bad HSPDP hapoh ka lama jong ka Regional Democratic Alliance (RDA) ki la hiar ban pynlong jingïalang ha Mawkyrwat katba ka Voice of the People Party (VPP) ka la pynlong jingïalang ha Nongstoiñ.
La jan baroh ki heh jong kine ki lai tylli ki Party ki la poi sha kine ki artylli ki jingïalang ban pan jingkyrshan na ka bynta ki kyrtong jong ki. Ka RDA na ka bynta u Bah Robertjune Kharjahrin bad ka VPP na ka bynta u Dr. Ricky Syngkon.
Wat lada ka VPP kam shym la leit sha Nongstoiñ kyrpang tang na ka bynta u Kyrtong MP, hynrei ka leit na ka bynta ka jingpynrung dkhot sha ka Party kumba ka ju leit kylleng kylleng ki jaka bad ruh ban pynshai ïa ki nongrim ka Seng, hynrei u kyrtong MP, u Dr. Ricky Syngkon ruh u la don lang bad ai jingkren ha kane ka jingialang, kaba la poi da ki hajar ngut ki paidbah ha ka jingïalang kaba la pynlong ha ïew Nongstoiñ. Ki nongkren ha kane ka jingïalang na ka liang ka VPP ki la pynkynmaw ruh ba ka por ka la dei ban phah noh da u briew uba la bit uba la biang bad uba don ka jingïohi jngai ban long kum u nongmihkhmat sha ka Lok Sabha.
U Dr. Ricky ha ka jingkren jong u, u la pynkynmaw ïa ka jingsahdien ka jylla wat hadien palat sanphew snem ba ka la ïoh la ka jong ka jylla, namar ka jingbym ïohi jngai jong ki nongïalam naduh kip or ba mynshuwa. U la ong ruh ba ka jylla ka donkam ïa ka jingkylla ban wanrah ïa ka jingsynshar kaba khuid kaba suba khnang ban lait na ka jingbamsap.
Ha kane ka jingïalang la ïoh ruh ïa ka jingkren na u bah Ardent Miller Basaïawmoit bad kiwei kiwei de ki nongïalam.
Ha Mawkyrwat pat ki nongïalam ka UDP kiba la poi ki long u Bah Metbah Lyngdoh, President, Bah Renik Lyngdoh, MLA Mawkyrwat, Bah Pius Marweiñ MLA Ranikor bad kiwei kiwei. Nangta naka HSPDP ka don u Bah KP Pangniang, President bad kiwei kiwei de ki nongïalam, kynthup ïa u Bah Robetjune Kharjahrin uba long u kyrtong ïamonlang kine ki Seng.
Haba kren ha kane ka jingïalang u Bah Robert, u la ther ïa ki nongïalam jong ki National Party kiba ju mlien ban beiñ ba ki seng Riewlum ki kut tang ha Khanapara lane kin leh aiu ki Seng Riewlum kin phah tang uwei ne arngut ki MP. Hynrei u la pynkynmaw ba naduh ba ka Meghalaya ka la ïh la ka jong ka jylla, ki Seng Riewlum ki la phah arngut ki MP, kita ki long u Prof. GG Swell bad u Bah Hoping Stone Lyngdoh. U la ong ba kane ka jingkynnoh jong ki nongïalam ki National Party ka paw ba kim tip satia ïa ka history jong ka jylla.
La ïoh jingkren ruh na u Bah Metbah Lyngdoh, Bah KP Pangniang bad kiwei kiwei de.