Shukor u Bah Prestone ïa u Samla ba seng kam lajong, hap kit ram da ki phew lak

Shillong, Risaw 13: U Samla Vicky Nelson Marbaniang uba dei u nongshong shnong jong ka thaiñ Pynursla uba la pyndep ïa ka jingpule pyntbit ha ka laiñ mechanical engineering bad uba la ïaid shakmat ruh ban sdang ïa company lajong ha ka sngi Palei u la pynpaw ïa ka jingsngew bitar halor ka jingshah shukor jong u ha u Symbud Myntri Rangbah ka jylla u Bah Prestone Tynsong ïa ka jingkular jong u ban ïarap ha ka jingseng ïa ka jaka ai jinghikai ïa ki samla ha ki laiñ machine da kaba yn soi MoU bad ka kompeni kaba u seng ïa kaba la jer kyrteng kum ka Techpoint Academy.
Hadien ba na ka liang jong u u la dep ban register u la ïathuh ba man u bnai u hap ban siew khajna GST man u bnai bad namar ba um ïoh pat ïa ka jingkyrshan na ka sorkar jylla da kaba soi MoU bad kane ka kompeni un hap siew ïa ka kuna sha ka Ministry of Corporate Affairs kaba kot da ki phew lak bad u hap ban kit da ka ram na bynta kane.
U la ong ba na ka liang jong u naduh ka sngi kaba nyngkong u la leit ban pan jingmut shuwa na u Bah Prestone bad ha kane ka jingpan jingmut u Bah Prestone u la ai mynsiem bad pynshlur ba un ïaid shakhmat bad ong ruh ba na ka liang ka sorkar kan kyrshan ha kti ha kjat ïa u.
“Ha ka jingïakynduh bad u Bah Prestone bad u Vijay Kumar u ophisar ki la ïaroh ïa ka projek kaba nga la maitphang hynrei ynda dei ka por ban sdang shisha ha ka jingleit kynduh biang ki shu bthah beit ba ngan sahngeh noh shisyndon namar ki la don da ki bar jylla kiba la wan sdang ïa kane ka jait kompeni. Kane hi ka pyni ba kane ka sorkar kam kwah ïa ki Khasi ban kiew ha ka kam ka jam hynrei ka ba kin shaniah tylli beit ha u naduh ka bai kyïad, bai biri bad kiwei kiwei,” u la ong
U la ong ba na ka liang jong u um shym la pan ïa ka pisa na ka sorkar jylla na bynta ban sdang ïa kane ka kompeni jong u namar ïa ka mang pisa u la ïoh na ka NEC bad kiwei pat ki tnat treikam jong ka sorkar pdeng.
U la ïathuh ruh ba na ka liang jong u hadien ba u la ïoh ka jingkular na ka sorkar ba kan kyrshan ïa ka jingthmu jong u u la pynlut pisa da ki bun bun lak ban pynkhreh ïa ka DPR bad ka por ruh ha ka jingpynkhreh ïa ka sorkar.
Une u samla u la kynnoh tyngeh ruh ïa ki ophisar ka sorkar khamtam eh ïa u Vijay Kumar ba ki dei ki men bamsap kiba bam kruiñ ïa ka lawei ki samla kiba ha ka jingshisha ki don ka kabu ban kiew bha lada ki ïoh ka jingkyrshan kaba pura na ka sorkar.
Hadien ba une u samla u la shah shukor ha kane ka rukom u la ong ba na ka liang jong u un leit ban pynshai pynsngewthuh sha man ki shnong jong ka Pynursla ba kim dei ban dang pynjop biang ïa u Bah Prestone namar kan sa jot ka lawei jong ka thaiñ bad jong ki samla hi baroh.
“Kumba sha Pynursla ka ïaid ka jingong ba wei ba la shim pisa na u Bah Prestone ha ka por ilekshon ki shait ong ba lada ym kyrshan ïa u, ka ksuid Rngaiñ kan bam ïa ki. Nga kwah ban pynsngewthuh ba kane ka dei tang ka jingngeit bieit namar nga ruh nga la ju shim hynrei ngam leilei bad ïa kane ngan leit man ki shnong ban kren halor kane ka mat” u la ong