5 bnai shuwa ban long elekshon, bthah ka sorkar ban pyntreikam noh ïa ka DA

Yn pynkiew na ka 25% sha ka 28%

0

Shillong, Risaw 13: Da ka jingpeit khmat sha ka elekshon MLA ka ban sa long ha u 2023, ka sorkar mynta ka sngi, ka la bthah ban pyntreikam noh ïa ka Dearness Allowance ne ka Dearness Relief ryngkat bad ka jingpynkiew na ka 25% sha ka 28%.
Katkum ka jingpynbna ne ka Office Memorandum ba la pynmih da u Dr. Vijay Kumar D, IAS, uba long u Commissioner & Secretary to the Government of Meghalaya, Finance Department, la ong ba kane ka Allowance yn siew ne kheiñ naduh ka 1 tarik u Kyllalyngkot ka snem 2022.
Shuh shuh kane ka jingpynbna ka ong ruh ba kane ka DA kan treikam ïa baroh ki nongtrei sorkar, nangta ki nongtreikam sorkar kiba la ïoh penshon bad kumjuh ruh ki nongtrei ha ki Board, ki Corporation bad kiwei kiwei de ki bor treikam kiba hap hapoh ka jingpeit jingkhmih ka sorkar.
Hynrei kan nym treikam pat na ka bynta kito ki ba la ïoh penshon ki la thungkam ne pynrung kam biang ha kino kino ki bor treikam jong ka sorkar jylla ne ka sorkar pdeng.
Dang ha u bnai Jymmang mynta ka snem ka sorkar jylla ka la rai ban pynkiew ïa ka DA na ka 22 % sha ka 25%. Mynta pat ka la pynkiew biang sa 3% kaba long 28%.
Ka jingsiew ïa ka DA ka long 3% na ka Basic Pay.

Leave A Reply

Your email address will not be published.