Da kynmaw bha shwa ba phin kdew kti ïa kiwei ong ka MLA ïa ka AITC

0

Shillong, Risaw 13 : Ka MLA jongka East Shillong Constituency ka Dr Ampareen Lyngdoh ka la bthah ïaka All India Trinamool Congress (AITC) ba kan kynmaw bha shwa ban kdew kti ïa kiwei namar kane ka party ka la pynkulmar jingmut da shisha ïaki paidbah khlem ki nongrim kiba biang.
“ Kumta lada phi kdew kti ïa kiwei ki party ha kiwei ki jylla kynmaw haba ka party jongphi mynta ka mad ïakiba bun ki jingeh ha West Bengal, kumta kynmaw bha haba phi kdew kti ïakiwei” ong ka Dr Ampareen ha kaba kren pyrshah ïak a AITC kaba la shu kynnoh khlem nongrim ïa ka sorkar MDA.
“ Hooid ka liang pyrshah ka lah ban kynnoh na ka por sha ka por, hynrei na kata ka daw nga sa ong da kynmaw bad bishar bniah shwa ba phin kynnoh ïakiwei. Hooid ïa nga kam pher lada ki kren kumno kumno ruh, la nga leh ne khlem leh ruh kam pher bad kam don jingmyntoi namar ngan ïai bteng ban leh ïa kaei kaba nga dei ban leh na ka bynta ki paidbah. Ngan ïaid shakhmat bad ngan leh klet beit ïa kiba pyrshang ban pynthut ne pynwit ïa nga namar kam myntoi namar kin sa long kam kai hi ha ki bnai ban sa wan. Kynmaw ba kine ki kam kai ba phi leh politik kin ym treikam da lei lei ruh ha Meghalaya hangne phin ym lah ban pynbeij ïa ki paidbah da ki ñia kai bad khlem nongrim jongphi ko AITC”.
Hato kine ki nia kai jongphi (AITC) kan ktah ïano, mano ban pule ïa kine ki nia kai jongphi ha ki social media, hato u briew u bym lah ban thied ïa ki mobile rem dor un don jingtip shaphang kine kiei ei. Phi dei kiei ba phi wan batai stad bad kynnoh khlem nongrim. Hato phi mut ba phin lah ban pynbiej ïa ki briew kiba la nang la stad kiba la tip kaei kaba la jia ha ka jylla. Phi lah ban bteng ban ïai leh tangba kynmaw kine da lei lei ruh ruh kin ym lah ban pynthame ïa ki paidbah hangne ha Meghalaya. Kynmaw ba ka Meghalaya bad West Bengal ki ïapher bad ynda phi la ïohi kaei kaban jia ha West Bengal phin sa kyndit bynriew.

Leave A Reply

Your email address will not be published.