ïaphylliew jingmut ba kwah jied Rangbah Shnong ki Kynthei, bthah ka HC

Shillong, Risaw 13 : Ka Meghalaya High Court ha ka sngi Palei ka la bthah ïa ka Khasi Hills Autonomous District Council (KHADC) bad ïa ka ophis jong u Syiem of Hima Mylliem ban pynlong da ki jingïamir jingmut bad pynshai ïa ki shnong ki thaw ban pdiang ïa ka jingïa long ryntih lang ha ka imlang sahlang da kaba ailad ïa ki longkmie ruh ba kin shim bynta ha ka jingjied Rangbah Shnong.
Ha ka hukum kaba la pynmih hadien ka jingbishar ïa ka jingujor ba la ujor da kawei ka Kong Aneeta Synrem ka Division Bench la kyntu ïa ka KHADC bad ka ophis u Syiem Hima Mylliem ban sdang da ka jingïaphylliew jingmut bad pyrshang ruh ban pynsngewthuh ïa ki nongshong shnong kiba khlem pat pdiang ïa ka jingshim bynta lang ki longkmie ba kin pdiang lang ïa ka jingdonbynta lang jong ki.
Da kaba bynrap ruh ba ki ‘third gender’ bad kito kiba don ïa ki jinglong kynthei jinglong shynrang ba kham pher kiba la ithuh mynta salonsar wat ha ka ri ruh, ka Bench ka la ong ba ka long ruh kaba donkam ban peit ba ka jinglong ïa ryngkat kyrdan kaba ka nongujor ka kwah ban donlang kan wan na ka sur uba bun balang.
Ka Bench ka ong ruh ba ki khmih lynti ba ha shwa ba ka jingshong bishar biang halor katei ka mat kan poi biang ha ki phra taiew ban wan, ka KHADC bad u Syiem Mylliem kin leh ei ei noh bad phah ïa ka kaiphod sha ka Iing Bishar.
Shuh shuh la ong ba da ka jingnang kiew ha ka liang ka pule puthi bad ruh ka jingkhmih lynti ka la nang jur, khamtam eh haba la bud ïa ka jingai jait kmie bad ba ki kynthei ki ïoh ïa ka burom kaba khraw bha ha ka imlang sahlang kumta ka paw ba tang namar ba dei ka kynthei kin ym lah ban shim bynta pat ba ha ka rai ban jied mano ban synshare ïa ki ha ki shnong ki thaw.