Shillong, K’Lyngkot 24 : Da ka jinglamkhmat jong u Lat ka Jylla, u Brig. (Dr.) BD Mishra (Retd), ka Raj Bhavan Shillong ka la pynlong ïa ka lympung ïalehkai basketball bad tennis ha ka madan ïalehkai thymmai ha Raj Bhavan, Shillong kaba la sdang naduh ka 24tarik – 28tarik mynta u bnai.
Ha ka jingïalehkai ha ka liang ki shynrang, ki don phra tylli ki kynhun ba wan shim bynta ha ka basketball katba ki don tang ar tylli ki kynhun ha ka liang ki kynthei. Ha ka jingïalehkai tennis pat ki don 14 ngut ki nongshim bynta ha katei ka jingïakob. Ha ka jingïakhun kaba long ha kane ka sngi Ba-ar, ka Umroi Military Station ka la ïoh ban pynliem noh ïa ka Assam Rifles ha ka jingïakhun kaba mar itynnad bha. Kane ka long katkum ka kyrwoh ba la phah da u PRO jong u Lat ka jylla.
