Mairang, Nailar 14: Kum ka jingïasnohkti lang ha ka jingrakhe ïa ka sngi kyrpang ki samla ha shi tyllup ka pyrthei ka District Sport Officer jong ka West Khasi hills ha ryngkat ka jingïatreilang bad ki ki samla jong ka Eastern West Khasi hills ha kane ka sngi balang ba la dep ka la pynlong ïa ka programe ba kyrpang da ka jingïakop pynisap ha ka rwai ka siaw, ka term ka put bad kiwei kiwei.
Ïa katei ka prokram la pynlong ha Ïngdorbar Mairang Mission ha Mairang ha kaba ki khynnah pule na ki skul bapher bapher bad ki samla na kylleng ki shnong napoh ka district ki la wan ban ïa shim bynta. Ha katei ka sngi u bah Lastborn Myrthong Assitant Commssioner ka Eastern West Khasi hills u la long u kongsan ha kaba ka kong Blarina Syiem District Sport Officer West Khasi hills ka la long ka symbud kongsan U bah Myrthong haba kren kum u kongsan ha katei ka sngi u la ong ba ki samla ha kane ka juk ki la long kiba kham proh bad kiba kham shemphang ha kaba pyndonkam ïa ka jingstad lyngba ki kor ki bor ba la pyndonkam lyngba ka saïan bad technoloji . U la ong ruh ba ka jingtip ban pyndonkam ïa ka telkhnoloji kaba thymmai lyngba ki kor ki bor ka ïarap ïa ki samla ban pynïar ïa ka jingtip bad ka jingmut jingpyrkhat ba kin pyrshang ban trei ïa shibun ki jait kam .
U bah Myrthong u la ong ruh ba ha kine ki sngi ka jingshah kynnoh ïa ki samla ka jur bha haba ki sdang ban leh ïa kiei kiei na ka bynta ban ïeng ha la ki kjat bad ban tei ïa ka lawei ka jong ki hynrei wat hapdeng ki jingshah kynnoh, ki jingshah kren beiñ ba bun jait kim dei ban kynran dien haba ki sngewthuh ba ki leh ïa kaba dei na ka bynta ka lawei jong ki , ka shnogn ka thaw, ka imlang sahlang bad ka jaitbynriew namar ka lawei jong ka ri bad ka jaitbynriew jong kano kano ka jylla bad ki ri ha ka pyrthei ka shong ha ki samla. Ha katei ka sngi la sam ruh ïa ki khusnam sha ki nongjop ha ka jingïakop rwai, shad put ban tem.
Ha katei ka juh ka sngi ka ophis jong ka North East Network ha ryngkat ka jingïatrilang bad ka ophis Deputy Commssioner Eastern West Khasi hills ka la pynlong ïa ka Photo Exhibition lane ka jingïakop shondur halor ka phang, “Through our eyes a photo Exhibition.” Ïa katei ka jingïakop shondur la pynlong ha Multipurpose hall ha ophis jong ka Deputy Commissioner Eastern West Khasi hills kaba don ha ka shnong Mawsawa. Ha katei ka sngi ka ong Anita Kharpor IAS Deputy Commissioner ka Eastern West Khasi hills ka la long ka kongsan bad u bah Lasborn Myrthong Assistanr Commssioner kum u symbud kongsan.
Na ka liang ka North East Network la wan ban mihkhmat da ka kong Balarisha Lyngdoh State Co-ordinator bad kiwei kiwei ki dkhot jong ka NEN ryngkat ki samla. Ka kong Anita Kharpor IAS haba aijingkren kum ka kongsan ha katei ka sngi ka la ong ba ha kine ki sngi ki samla ki dei ban don ïa kajuh ka thong ban ïeng ha la ki jong ki kjat wat la ki don ha la ki jong ki jong ki jaka, ki thaiñ bad ki shnong bapher bap her hapoh ka jylla. Shuh shuh ka la long ba dei ha ka por samla ba ki hap ban shim khia bad ban shim ïa ka sien jam ban pynsngewthuh lem ïa kiwei pat ba kin don ïa ka thong kaei ba kin leh na ka bynta ka lawei jong ki ha ki shnong ki thaw na ka bynta ban wanrah ïa ka bha ka miat, ka shongsuk shong saiñ bad ka imlang sahlang kaba bha. Khatduh eh ka la kyntu ïi samla kynthei bad shynrang ba ki dei ban don ïa ka jinglong kaba bha bad ka jingpynïaryngkat kyrdan ha baroh ki kam hapdeng ki samla shynrang bad ki samla kynthei.
