Kynduh Doktor Veterinary ka FKJGP Sawsymper Circle bad ka Seng Kynthei Sawsymper

Mawkyrwat, Nailar 14: Ka Federation of Khasi Jaiñtia & Garo people (FKJGP) Sawsymper Circle ha ryngkat bad ka Seng Kynthei Sawsymper, East Khasi Hills District, ki la pynpaw ïa ka jingsngewkhia kaba jur halor ka jingjia jong ka jingïap khlam jong ki sniang ha ki shnong bapher bapher hapoh ka dong ka thaiñ Sawsymper.
Halor kane ka jingjia, ka seng ka la ïohpdiang ïa shibun ki jingujor na ki paidbah halor ka jingïap jong ki sniang. Kumta, ka kynhun ka la leit ban ïakynduh ïa ka Dr. D. Kshsiar ha ka Veterinary Office, Laitmawsiang, East Khasi Hills District, ban pynsngew ïa ka jingeh bad ban ïakren halor ki lad ki lynti ban ïada bad tehlakam ïa kane ka jingïap khlam jong ki sniang.
Ïa kane ka kynhun la lamkhmat da u Bah Runningstar Kharbani, President ka FKJGP Sawsymper Circle, bad ka Kong Betamon Kharbani, President ka Seng Kynthei Sawsymper.
Hadien ka jingïakynduh hapoh ka Veterinary Office, ka seng ka la pyntip ba ka la ïoh jingtip ba kawei na ki daw ba kongsan jong ka jingïap bun jong ki sniang ka long ka jingpang African Swine Fever (ASF). Kumta ka seng ka pynpaw ruh ba kiba bun na ki paidbah, khamtam ki nongri sniang, kim pat tip bha shaphang kane ka jingpang, namarkata ki la ïa rai ban pynlong da ka jingpynshai paidbah ne ka Awareness program ha ki shnong ki thaw kiba hap hapoh ka Sawsymper khnang ba ki paid bah kin sngewthuh shai ha kaba ïa dei bad kane ka jingpang bad khamtam eh kumno ban tip ïa ki lad jingïada.
Shuh shuh, hadien ka jingïamir jingmut, ka seng ka la kyntu jur ïa ka Sorkar lyngba ka tnat Veterinary ba kan shimkhia ban pynbiang ïa ki dawai ki dashin, ki jingdonkam, bad ki lad jingïada kiba biang na ka bynta ki nongri sniang, khnang ban ïarap ïa ki ban ïada ïa ki jingri jong ki bad ban pynduna ïa ka jingduhnong.
Ka seng ka la pynpaw ruh ba kan sa shim ïa ka sienjam ban leit ïakynduh ïa u Myntri ba dei khmih ïa ka tnat Veterinary, ban ïakren sani halor ka jingjur jong ka jingïap khlam jong ki jingri, khamtam ki sniang, bad halor ki jingeh kiba ki nongri jingri ki mad ha kane ka por.
Ha kajuh ka por, ka seng ka kyntu jur ïa ki nongot sniang ba kim dei ban shim kabu ïa ka jingeh jong ki nongri sniang da kaba thied ïa ki sniang ha ki dor kiba tad namar ba ka jingpynhiar dor palat ïa ki sniang ha kane ka por ka lah ban wanrah ïa ka jingduhnong kaba khraw ïa ki trai nongri, kiba la mad lypa ïa ki jingeh kiba bun namar ka jingpur jong ka jingpang.
Ka FKJGP Sawsymper Circle bad ka Seng Kynthei Sawsymper ki pynpaw ïa ka jingkyrmen ba ka Sorkar bad ka tnat Veterinary kin shimkhia ïa kane ka bynta, bad ban pynkloi ïa ki lad jingïarap bad ki lad jingïada na ka bynta ki nongri sniang ha ka thaiñ Sawsymper.