Mairang, Nailar 07: Ka jingïapyninam ïa ki mar rep kaba la pynlong da ka ophis jong u District Horticulture Officer Eastern West Khasi hills district ha Mairang kaba la tip kum ka District level Cum Competition on Horticultural Crops and Honey kaba la sdang naduh ka sngi Palei ka 6 Nailar bad kaba la pynkut noh ha kane ka sngi Thohdieng ka 7 tarik Nailar ka la long kaba shongshit bha ha kaba ki nongrep na kylleng ki shnong napoh ka district ki la wan ban ïashim bynta.
Katei ka jingïakob kam dei tang ïa ki mar rep hynrei ha kajuh ka lympung la pynlong ïa ka jingïapyni ïa ki syntiew ba bun jait ba ki nongrep ki ju rep na ka por sha ka por. Nangta ka jingïapyni nam ïa ka um ngap bad kiwei kiwei. Ïa katei ka lympung pyni nam la pynlong ha phyllaw jong ka ophis jong ka District Horticulture Officer ha kaba ki ophisar sorkar ba kynthup ïa ka kong Bansara Mylliemngap Director jong ka tnad Horticulture, u bah Victor Kharbuki Joint Director, ka kong A. Nongbri District Agriculture Officer Eastern West Khasi Hills bad kiwei ki ophisar na ki tnad treikam jong ka sorkar.
Ki ophisar jong ka tnad Horticulture haba ai jingkren ha katei ka lympung pyninam ïa ki mar rep, ki syntiew ki skud bad kiwei kiwei ki la ong ba katei ka jingïapyninam ka long kum shi bynta ban kyntiew ïa ka rep ka riang bad ban pynshlur ruh ïa ki nongrep ba kin trei shitom bad ban minot ïa ka rep ka riang namar ba ki nongrep ki dei ki kynrad hapoh ka ri bad ka pyrthei hi baroh kawei namar lada ki nongrep kim don ka jingkyrduh bam ha ka ri kan ktah ym tang ïa ki paidbah hynrei ka ïoh ka kot jong ka ri kan hiar arsut na ka por sha ka por.
Ha katei ka sngi pynkut ki ophisar ki la sam ruh ïa ki khusnam sha ki nongrep kiba la jop ha ka jingïapyninam ïa ki mar rep.
