Shillong, Nailar 07: U General Secretary ka Seng Meghalaya Pradesh Congress Committee (MPCC) u Bah Manuel Badwar bad u Bah Eugine Jarain, President laitumkhrah Block Congress ki la khot la wer ïa ki paidbah ban ïa shim bynta ha ka jingïaid paidbah kaba jai jai ka ban long ha ka 10 tarik mynta u bnai, 2026 ban pyrshah ïa ka jingpynkylla ka sorkar pdeng ïa ka Foreign Contribution Regulation Amendment Bill, 2026, bad kane ka jingïaid paidbah kan sdang na Fire Bridge sha Don Bosco Point Laitumkhrah ka ban sdang ruh ha ka por 11.00 baje mynstep.
Haba kren bad ki lad pathai khubor kitei ki nongïalam ki la khot sngewbha ïa baroh khamtam kito kiba la shah sumar, kiba la nang lah stad bad kiba la ïoh ki jingai jingshakri bapher bapher ha ki kynhun seng niam, ki Balang Khristan ba mynta ka la dei ka pali jong ki ban kyrshan kylla haba kine ki kynhun kin shah ktah lyngba ka jingtyrwa ka Sorkar Pdeng ban wanrah ïa ka Foreign Contribution (Regulation) Amendment Bill, 2026, hapoh ka jingïalam ka BJP.
Ki la ong ba kane ka Bill ka la pynmih ïa ki jingsngewkhia namar ki jingktah kiba lah ban mih halor ki Balang, ki kynhun treimon sngewbha, ki jaka pule, ki hospital, ki jaka ri khunswet bad kiwei kiwei ki shlem treikam kiba la shakri ïa ki paidbah jong ka jylla da ki phew phew snem.
Katkum ki kyndon ba la tyrwa, ki jingdon jingem jong ki kynhun kiba la ïoh jingïarap lyngba ka Foreign Contribution, ki lah ban wan hapoh ka bor jong ka Designated Authority lada ïa ka FCRA Registration jong ki ym shym la pynthymmai, ka la kut noh, lane la kyntait ban pynthymmai bad lada ka don ka jingpynslem ban bud ïa ki kyndon ka Sorkar Pdeng kan sa knieh noh ïa ki jingdon jingem kine ki kynhun.
Halor ka jingkylli la ka Sorkar MDA ha jylla Meghalaya hapoh ka jingïalam ka NPP ka shimkhia ne em halor kane ka kam, u Bah Badwar u la ong um shym la ïohi satia ïa kane ka jingshimkhia.
U la ong ruh ba um tharai ba ka Sorkar MDA kan mynjur da ka Resolution hapoh Ïingdorbar Thaw Aiñ ka Jylla.
U la ong ruh ba ka jingthmu jong ka sorkar pdeng ban wanrah jingpynkylla ïa ka FCRA ka dei ruh ka jingthmu jong ka BJP ban kurup ïa ki jaka jong ki kynhun niam ne jong ki balang Khristan naba dei tang ki kynhun balang Khristan ha ka ri India kiba don ki jaka pule kiba bha, ki jaka ri khun swet, ki jaka sumar bad lada kine kim lah ban bud ïa ki kyndon kumba la bthah hapoh ka Aiñ khlem pep ka sorkar pdeng kan sa knieh noh ïa ki jingdon jingem jong ki.
“Kiba bun ki MLA, ki MP bad wat ki ophisar hapoh ka ri India ki dei kiba la pule na ki jaka pule jong ki kynhun Balang Khristan bad kumjuh ruh kito kiba pang ba shitom ki la leit phah sumar ha ki jaka ne hospital ba la seng da ki kynhun Balang Khristan, kumta kim dei ban pyrshah hynrei ban ïatreilang ban pyrshah bad pynpaw ka jingsngewkhia ïa ka jingtyrwa ka sorkar pdeng ban pynkylla ïa kane ka FCRA,” ong u General Secretary ka MPCC u Bah Manuel Badwar haba kren sha ki lad pathai khubor.
