Rakhe ka NIFT Shillong ïa ka National Handloom Pakhwada, ka jingthaiñ ïa ka pateng ka India

By Mawphor Editor On Aug 8, 2026

Shillong, Nailar 07: Ka National Institute of Fashion Technology (NIFT), Shillong, ka la rakhe ïa ka National Handloom Pakhwada 2026 da ki jingïalang kiba iphuh iphieng naduh ka 3 tarik haduh ka 21 tarik u Nailar 2026, kaba kynmaw burom ïa ki riti dustur thaiñ jaiñ ba riewspah jong ka India katba ki ai mynsiem ïa ki samla ban long ki nongsumar ïa ka pateng ba ïadei bad ki jaiñ jong ka ri.
Ka jingrakhe ka pynïasoh lang ïa ki nongthaiñ jaiñ, ki samla pule, ki nonghikai, bad ki riewieid ïa ki kam thaiñ jaiñ ha ka jingpyrshang lang ban pyndon burom ïa ka pateng jong ki kam thaiñ jaiñ jong ka India bad ban pynkhlain ïa ka jingdonkam ban pynneh pynsah ïa ki dustur thaiñ jaiñ bapher bapher jong ka thaiñ Shatei Lammihngi jong ka India.
Da kaba ïoh mynsiem na ki rukom pyrkhat jong ka Swadeshi Movement, kaba la kyrshan ïa ka jingtrei kti bad ka jinglah ban kyrshan dalade, kane ka jingrakhe ka pyndonburom ïa ka kam thaiñ jaiñ kum ka dak jong ka jinglong tynrai jong ka India bad ka lawei kaba ïaineh. Kawei na ki bynta ba kongsan jong kane ka jingrakhe ka la long ka jingpyni live ïa ka rukom thaiñ jaiñ, kaba la plie paidbah ha ka 3 tarik u Nailar 2026, ha kaba ki nongthaiñ jaiñ ba tbit ki la pynlong ïa ki jingpyni ïa ka rukom thaiñ jaiñ bad ïakren bad ki nongïashim bynta, da kaba ai jingmut shaphang ki rukom thaiñ jaiñ tynrai, ki tiar tynrai, bad ka jingdonkam ha ka kolshor.
Ka jingpyni ka la long kum ka rynsan na ka bynta ka jingïasam jingtip hapdeng ki nongtrei kti bad ki samla pule. Ka la sakhi ïa ka jingïashim bynta shit rhem na ki samla pule jong ka NIFT Shillong ha kylleng ki Tnad, ha ryngkat ki samla pule na ka Tnad Home Science, St. Mary’s College, Shillong.
Haba ai jingkren ha kane ka jingïalang, u Dr. Brijesh Deore, Director ka NIFT Shillong u la ong, ‘Ka kam thaiñ jaiñ kadei kawei na ki spah bakhraw jong ka India. Kum ki nongshong shnong kiba don ka jingkitkhlieh, baroh ngi don ka jingkitkhlieh ban pynneh pynsah bad kyntiew ïa ki riti dustur tynrai jong ngi kiba ïadei bad ki jaiñ. Ha ka NIFT Shillong, ngi ngeit ba ka jingpule kadei ban pynïasoh ïa ki samla pule bad ki nongthaiñ jaiñ khnang ba ka jingstad tynrai kan lah ban ai mynsiem ïa ki jingsaiñdur thymmai ha ka juk mynta. Kadei ka jingpyrshang jong ka NIFT ban pynïasoh bad ki nongthaiñ jaiñ ha ki rynsan bapher bapher, bad ban kyntiew ïa ki mar na ka thaiñ sha ka pyrthei.’
Ka Kong Lebaini Rymbai kaba dei ka Nongseng jong ka Eri Weave, Meghalaya ka la ïaroh ïa ka NIFT Shillong kaba la wanrah ïa ka rynsan kaba pynïasohlang ïa ki nongthaiñ jaiñ, ki nongtrei kti, ki riewshemphang, bad ki samla nongsaiñ dur ban rakhe ïa ka pateng jong ka India ha kaba ïadei bad ka kam thaiñ jaiñ. Haba kren shaphang ka jingïaid lynti jong ka ha ka kam seng kam seng jam ban tei ïa ka kam shna silk Ryndia (Eri) kaba ïaineh bad ban ïoh ïa ka jingbei tyngka kaba kongsan ha ka Shark Tank India, ka la pynshlur ïa ki samla pule ban peit ïa ki kam shna jingshna tynrai kum ki lad ban saiñdur thymmai, ka kam seng kam seng jam kaba lah ban ïaineh, bad ka jingktah ha ka imlang sahlang. Ka la ban jur halor ka jingdonkam ban pynneh pynsah ïa ki dustur thaiñ jaiñ tynrai katba ka dang wanrah ïa ki lad ha kaba ïadei bad ki ïew kiba katkum ka juk mynta kiba pynkupbor ïa ki nongtrei kti bad pynkhlaiñ ïa ka kamai kajih ha ki jaka nongkyndong.
Ïa kane ka prokram la plie pyrda da ka Kong Regina Sujai, ka nongthai jaiñ kaba la tbit kaba la don palat arphewsnem ka jingshem phang ha ka kam thaiñ jaiñ Eri. La pawnam na ka bynta ka jingaiti jong ka ban pynneh pynsah ïa ki riti dustur thaiñ jaiñ tynrai jong ka Meghalaya, ka jingdon jong ka ka la pyni ïa ka jingdonkam ban ithuh ïa ki jingnoh synñiang ba kordor jong ki nongtrei kti kiba tbit ha kaba pynneh pynsah ïa ka kam thaiñ jaiñ ba riewspah jong ka India.
Ka jingrakhe ïa ka National Handloom Pakhwada 2026 kan bteng haduh ka 21 tarik u Nailar 2026, ha kaba kin don ki jingïakob shon dur bad shna reel, ki jingïakob saiñdur, ki natural dye workshop, ki jingïakob dro dur bad Quiz, bad ki prokram ba ïadei bad ka imlang sahlang bad ki lad pathai khubor. Lyngba kine ki prokram, ka NIFT Shillong ka pynskhem biang ïa ka jingkular jong ka ban pynneh pynsah ïa ka pateng thaiñ jaiñ jong ka India katba ka ai mynsiem ïa ki samla pule ha kylleng ki kam saiñdur, ka jingïakren, bad ka jingpynïaid ban rakhe, kyntiew, bad saiñdur thymmai ha ki kam ba ïadei bad ki jaiñ.
Ka jingrakhe ka pyndonburom ïa ki nongthaiñ jaiñ jong ka India, kiba ka jingtrei kti jong ki kaba ïaineh ka long ka tynrai jong ka jingsarong ïa ka kolshor bad ka jingai mynsiem ban saiñdur.