Nongpoh, Nailar 7: Uwei u rangbah bym lah satia ban ithuh, u la duh noh ïa la ka jingim hadien ba la suba ba u la shah tynrah da ka kali ha surok bah National Highway-6 ha ka shnong Mawtnum, Ri-Bhoi District.
Katkum ka khubor na ki pulit ka Ri-Bhoi, la ong ba kane ka jingjia ka la jia ha ka 5 tarik Nailar. La suba ba utei u rangbah u la shah tynrah da ka kali katba u dang don ha surok bah, hynrei hadien katei ka jingjia, ka kali kaba la tynrah kam shym la sangeh hynrei ka la phet krad na katei ka jaka.
Ki pulit haba ki la leit poi sha ka jaka ba la jia ka jingjia, ki la pyrshang ban ithuh ïa utei u briew da kaba wad ïa ki kot ki sla bad ka mobile phone jong u, hynrei kim shym la lap satia ïa kino kino ki sakhi.
Hadien kane, la pynkit noh ïa ka met sha Nongpoh Civil Hospital ban pyndep ïa ka post-mortem bad la buh ruh ïa ka met ha jaka buh metïap jong katei ka hospital ban ap ïa kiba haïing hasem lane kiba lah ban ithuh ïa u.
La antad ba utei u rangbah u don kumba 55 snem ka rta, u jrong kumba 170 centimeter, u don ka durkhmat kaba pyllun bad u phong ïa ka high-neck rong iong, ka tupia rong iong bad ka patlun rong blue.
Na ka liang ki pulit ki la kyrpad ïa kino kino kiba don jingtip shaphang jong utei u rangbah lane ki ba lah ban ithuh ïa u, ba kin sngewbha ban pyntip mar mar sha Police Control Room ha u 6909300160 lane sha Nongpoh Traffic Branch ha u 6909300158.
