Shillong, K’lyngkot, 21: Ka Lympung jong ki Khynnah ka Seng Khasi Sein Raij kaba 17 ïa kaba la pynlong da ka tnat Seng Khasi Krang Diengiei Pyllun ha ka 14 bad ka 15 tarik u Kyllalyngkot 2023 la ïashim bynta da ki heprit jong ki Seng Khynnah ka Seng Khasi bad ka Seiñ Raij.
Ha kane ka sien kaba mynta, ka phang pdeng jong kane ka lympung ka long “Ha la Thymmei ban tei ïa ka Lawei”.
U Kongsan ha ka sngi ba nyngkong jong kane ka lympung u long u Bah Samlin Malngiang katba u kongsan ha ka sngi kaba ar pat u long u General Manager jong ka District Commerce & Industries, Centre, Khliehriat u Bah Shape Paswet.
Ha kine ki ar sngi jong ka lympung, la pynlong ruh ïa ki kato katne ki jingïakob kum ka ïakob dro, mawpoiñ, siat khnam, pyni riam tynrai, ba la ïashim bynta shitrhem bha da baroh ki hep barit.
Haba phai pat sha ki prokram, la ïohsngew ïa ka jingpule ïa ka jingsneng Tymmen bad la pynbud pat sa ïa ki jingrwai, ki jingshad, ki skit ba lyngkot bad khamtam leilei ka phawar kaba la pynshongshit bha ïa kane kane ka lympung.
Nalor kata, la pynlong sa ïa ka prokram ïasyllok hapdeng ki nonghikai Seng Khynnah ka Seng Khasi bad ka shlem hikai tynre jong ka Sein Raij, kaba sawdong ka lyngwiar dpei ba syiad ha kaba manla ki nonghikai jong ki seng khynnah ki la wan shakhmat ban pynpaw ïa kaei kaba ki don ban ong ne ban ïa pashat jingmut lem sha ki para nonghikai ïa kaba la pynïaid ïa ka da u Bah Païa B. Synrem uba long u Asst. Genl. Secy, jong ka Lympung Ki Seng Khynnah.
La pynshit pynshngain ïa kane ka lympung ha ka shnong Krang da ki arngut ki Advicer jong ka synjuk kiba kynthup ïa u Babu Spiton Kharakor bad ka kong Mira Dkhar, u General Secretary jong ka Seng Khasi Kmie u Bah Hainess Marbaniang, u President ka Seng Khih Lang u Bah H. Robin Kurbah bad kiwei kiwei.
