Shillong, K’lyngkot 21: Hadien ba ka Election Commission of India (ECI) ka la ai ïa u Prah kum ka u symbol jong ka Voice of the people Party (VPP) kiba bun ki paidbah ki la pynpaw ïa ka jingkmen ïa kane ka shab kaba ka party ka ïoh “namar ka ïahap sbiak ïa kaei kaba ka party la pun la kha, kata ban weng ïa ki sohkyrdot ha ka synshar khadar” pynpaw ki long kmie ha ka jingïakren bad u Mawphor.
“Ha kine ki sngi ngi la shu kyndeh beit ban ïohi noh ïa u symbol ka VPP haduh ba ngi shu phohsniew beit ruh ïa ka dur i Bah Ardent ha ka jingkyndeh symbol palat namar ha ka jingphohsinew ngim kot jingmut shuh u symbol aiu ngin ïoh kum ka party bad mynta ba ngi la ïoh ïa u Prah ngin ïohthiah suk jai ynda miet,” ong ka long kmie na Mawmuthoh.
Haba kylli ïa ka jingsngew jong ki pat ïa ka jingïoh symbol da u Prah ki la jubab, “Uba da biang hi sbiak keiñ kumba ngi jied ïa u kba na u khaw, ïa u maw bad ki jakhlia ba don ha u kumta ruh ngi thikna ba ka VPP kan leh ïa kata ha ka synshar khadar,” kren sngew skhem ki long kmie.
Shuh shuh ka la ong ba kaba ka angnud hadien ka elekshon ka long ba kan ïohi ba ka VPP kan dei kawei na ki party khlaiñ bor ban don ha ka sorkar khnang ban wanrah ïa ki jingkylla kiba ki paid ka ri ki angnud dik dik.
“kaba da nang phi ka ECI ban ai symbol la kumba ka tip ïa ka thong ka VPP bad ka jinglong ka kam synshar khadar ha ka jylla kaba dawa ba dei ban khalah lut sharud ïa ki menbamsap da u prah ka VPP,” ong uwei u riew rangbah Pynursla
Shuh shuh u la bynrap, “Kita ki jingpynbiej man ka san snem bad ngop man ka san snem ruh da u prah ka VPP ngin kyndang noh ha kane ka kynti na Pynursla. Ka jinsgah set tulop ki nonghikai, ka jingshah siat bom pynsat khmat, ka jingbamsap ha ka kam bording kam khaw rashon, ka jingduh scholarship ki samla pule, ka jingbym biang ki jaka sumar bad ka jingshadien ka jylla hi baroh da u prah ka VPP ngin khalah noh” u la kren sngew skhem.
