Khliehriat, Jymmang 7: Ha ka rukom kaba i shongkum bad shongkhia bha, ki khun ki hajar jong ka Seiñ Raij Shnong Tuber ki la pynlong ïa ka shad Sukra myn ha ka sngi saitjaiñ ha ka biar Aitnar ha Tuberkmaishnong ha kaba u Deputy C.E.M jong ka Jaiñtia Hills Autonomous District Council, u bah Lasky Rymbai u la wan ban long kum u kongsan ha katei ka sngi bad la ïa don ryngkat lang ruh u Waheh Shnong Tuber Kmaishnong, u bah Miki Lyngdoh bad kiwei kiwei ki riew rangbah jong ak Seiñ Raij Tuber.
Haba kren ha ka lympung, u bah Lakky Rymbai, u la pynpaw ka jingsngewkmen ban iohi ïa ka jingphuh jingphieng ka leh niam shad sukra kaba ju pynlong hashwa ba ki khun ki hajar kin leit ban hiar sha ki lyngka, ki bri, ki hali ban bet ïa u symbai ha mei ramew, u la ai ka jingkhublei kitbok kitrwiang ïa ki kun jong ka Seiñ Raij Shnong Tuber ba kin man bha ha ka rep ka riang, ba kin ïoh ïa ka met ba koit ba khiahkrat, ba kin roi kin man bha ha ki kam ki jingtrei bad ha ka kamai kajih, ha ka ïoh ka kot jong ki, ha kajuh ka por, u la pynpaw ruh ka mynsiem ba sngewkmen ban ïohi ba ki riti ki dustur kiba la maitphang da ki longshwa ki dang neh dangsah haduh mynne, mynta ba ki khun ki hajar ki dang bud bad ki dang pynim pynnehpynsah ïa ki riti ki dustur u men barim.
Ha kane ka lympung shad sukra ha Tuber Kmaishnong, ka la don ruh ka jingshad tynrai kaba ju tip kum ka shad kylla pliang bad ka shad kyllaiñ kti ba la shad da ki khun jong ka Seiñ Raij Shnong Tuber, la wan ban sakhi ïa kane da ki paidbah kiba najan bad na jngai lem bad ki khun ki hajar jong ka Seiñ Raij Shnong Tuber.
Khyndiat shaphang ka jingleh niam Shad Sukra bad shad Pastieh:-Kane ka jingleh niam Shad Sukra ka dei kaba ki ju leh ha ri lum Jaintia naduh ki por u men barim,ïa kane ki ju sdang ban leh man la u snem naduh ka ka taïew ba khatduh jong u bnai lber haduh u bnai ïaiong bad la sdang ïa kane da ka Seiñ Raij Tuber ha kaba la sdang shwa da ka kñia Ryngkaw nangta pat ha ka sngi Hat (sngi ïew) lane ka Kyllaw la pyndep ïa ka kñia ryngkaw ha kaba baroh ki khun ki hajar jong ka Seiñ Raij Tuber kim dei ban leit trei leit ktah ha kane ka sngi Kyllaw, u Lyngdoh, ka Lyngdoh, ki Wasan baroh ha kane ka sngi ka dei ka sngi sum sngi sait jong ki bad ha kane ka sngi Kyllaw ha ka ka por shiteng synia mynmiet u Lyngdoh bad ki Wasan ha ka por kumba 1 baje mynmiet ki pyndep ïa ka kñia Shathoh, ïa kane ka kñia ki ju leh ha ka Iung Blai Lyngdoh ha Tuberkmai Shnong, hadien kane ha ka por synia por kumba 1 baje mynmiet u Lyngdoh u shim ïa u symbai bad u bet ha lyngkha kum ka dak ban pyndep shwa u Lyngdoh ïa ka jingbet symbai bad ha ka por mynsngi ha kaba ïa ka kñia ruh lah pyndep bad ïa ka jingbet symbai ruh lah pyndep kin sa pynlong ïa ka shad Sukra.
Ki khun shnong Bri shnong Khyndaw (kaba mut ki khun ki hajar kito ki bym dei na shnong Tuber) la ju khot da ki Sein Raij Shnong, kine ki Sein Raij Shnong ki lah ban leh ïa kane ka leh niam bad ka shad Sukra dei ynda la dep leh shwa u Lyngdoh jong ka Sein Riaj Tuber ha ka Iung blai.
Kumba ju long man la u snem, ha ka sngi kaba nyngkong u Lyngdoh u leh ïa ka kñia ka khriam, ha ka sngi ba ar pat ka dei ka sngi ban sum ban sait bad ha ka sngi ba lai ka ju sdang ka shad sukra da kaba ki ju wan bad ia poi lut baroh ki khun ki raiot jong ka Raij Tber bad hadien kane u Lyngdoh u pynbna ba lah biang ka por ban bet noh ïa ki symbai sha ki jaka rep bad ha kane ka sngi la ju pyndep ruh ïa ka Shad Pastieh ha Tuberkmai shnong.
Kane ka Shad Pastieh pat ka mut ba u Ryngkaw hadien ba la dep leh niam ha ka kñia ka khriam ba ju khot ka knia Ryngkaw, lada ka pyni ka ka dak kaba bha ba miat hangta kin sa pynlong ïa kane ka shad pastieh kaba ki ju shad da ka waitlam bad ka stieh ha kaba ki ju rah lang ruh ïa kata ka wait pom blang bad hadien kane kin sa hiar sha la ki jong ki jaka rep ban bet ïa u symbai.
