Shillong, Nohprah 16: Ka Estimates Committee (EC) jong ka Meghalaya Legislative Assembly, hapoh ka jingïalam jong u Chairman u Bah Mayralborn Syiem, MLA jong ka Nongpoh constituency, ki la pynlong ïa ka jingialang shong bishar kam bad ki heh ophisar jong ki tnat bapher bapher hapoh ka Conference Hall jong ka Member Hostel, Meghalaya Legislative Assembly, Shillong.
Ka jingthmu jong kane ka jingïalang ka long ban bishar ïa ki kam ba la leh bad kumjuh ruh ki jingïaid jong ki kam jong ka tnat Pule Puthi (Education), ka Koit ka Khiah (Health Department), ka tnat Public Health Engineering (PHE), bad ka Community & Rural Development (C&RD) Department.
Ha ka jingïalang la shim bynta da ki dkhot ka committee kiba kynthup ïa u Bah Renikton Lyngdoh Tongkhar (Mawkyrwat MLA), u Bah Adelbert Nongrum (North Shillong MLA), u Remington Gabil Momin (Rambrai-Jyrngam MLA), u Bah Wailadmiki Shylla (Jowai MLA), bad ka Miani D Shira (Ampati MLA), ha ryngkat bad ki ophisar jong ka Meghalaya Assembly Secretariat bad ki tnat bapher bapher.
Ha kaba ïadei bad ka tnat Pule Puthi ka committee ka shong bishar ïa ki jingïaid jong ki kam ha kaba ïadei bad ki 3 tylli ki Block Institutes of Teacher Education (BITE) bad ki residential school. Ka Committee ka la kyntu ïa ka tnat ban pynsted ïa ka jingpyndep bad ba dei ban long kaba kloi ban pyntreikam noh ïa ka Eklavya Model Residential Schools (EMRS) ha Ri-Bhoi bad ka East Garo Hills hapoh u snem 2025.
Halor ka tnat PHE (Jal Jeevan Mission), ka committee ka la banjur halor ka jingdonkam ban pyntreikam noh khlem da shah pynthut ïa ka jingtreikam jong ka Jal Jeevan Mission (JJM) ha ki thaiñ khappud bad ki la bthah ïa ka tnat ban pynsted ïa ki kam bad ban pyrshang ban ai ïa ki kaiphod ba bniah halor kane ka kam.
Ha kaba ïadei pat bad ka tnat ka Koit ka Khiah (MCH Hospitals), ka committee ka la bishar halor ka jingïaid ka kam jong ka Maternal and Child Health (MCH) hospital kiba thymmai ha Nongstoiñ bad Umsning, da kaba buh ka thong ban long kaba la khreh ban pyntreikam noh hapoh u snem 2025. Ka la kyntu ruh ba dei ban pynsted ïa ka jingkyntiew ïa ki lad ki lynti kiba dei ban don hapoh ki civil hospital, Primary Health Centre (PHCs), bad Community Health Centre (CHCs).
Halor ka tnat Community & Rural Development (C&RD), ka committee ka la shong bishar kam ruh halor ka jingtei ïa ki ophis Block Development Officer (BDO) kiba thymmai, da kaba buh ruh ba ka jingpyndep ka dei ban long 70-80%. Ka la kyntu ïa ka tnat ban pynthikna ba dei ban pyndep ïa ka project ha ka por kaba la buh khnang ban pynbun ki lad ai jingshakri hapoh ki C&RD block.
Hadien ba la dep ban shong bishar na ka liang u Chairman u Bah Mayralborn Syiem u la pynpaw ïa ka jingsngewhun halor ki jingïaid beit jong baroh ki kam bad jong ki project. U la ong, “Ka committee kan dang khmih lynti nangne shakhmat ban don ki jingïasyllok bad ba ki jingïakren mynta ka sngi bad ki tnat bapher bapher ba kin pyntrei ïa ki kam naduh ka mynsiem.”
