Ha ka kyrteng ki kam pynroi, yn pyndonkam bun ka jaka da kine ki Land Mafia, ong ka HYC

Shillong, Nohprah 16: Ka Hynñiewtrep Youths’ Council-Central Executive Council (HYC-CEC), ka la kyntu ïa ka sorkar jylla ba kan long kaba shai ha kaba ïadei bad ka jingpynkylla kaba dangshen halor ka Meghalaya State Investment Promotion Facilitation Act, 2024 ha kaba ka Investment Meghalaya Agency (IMA) ka ïoh ïa ka bor ban thied bad ban ai ïa ka jaka sha kiba wan ban seng ïa ki karkhana ne ki Investor.
“Ngi dawa ba kane ka jingtyrwa jong ka jingpynkylla dei ban pan ka jingmut na ki paidbah khnang ba kin lah ban ai ki jingmut bad ki jingkdew ki jong ki bad kumjuh ruh ha ki riew shemphang ha shwa ban mynjur ïa kane ka jingpynkylla bad ban pynlong ïa kane ka aiñ da ka State Assembly,” ong u President ka seng u Bah Roy Kupar Synrem.
U la ong ba ka seng ka don ban ai jingmut ba kane ka Amendment kan sa pynmih ïa ka jinglong jingman ha kaba ka IMA, lyngba ki Land Mafia ha ka jylla kin sa pynïaid bad peit ïa ki jingdie jaka ha ka jylla Meghalaya. Ha ka kyrteng jong ka IMA bad ka roi ka san, kan don kam bun bha ka jaka ban pyndonkam da kine ki Land Mafia na ki trai jaka bad hadien pat kin sa die ïa ki ha ka dor kaba heh sha ka sorkar jylla.
“Kane ka jingtyrwa ban pynkylla kan wanrah ruh ka jingma jong ka jingshah phiah ki jaka jong ki riewlum ha ka jylla sha ki bar jylla ne ki corporate house bad kane la thikna kan pynhiar dor ïa ka jingithuh jong ki riewlum bad ka jinglong laitluid jong ki, kaba ngi la ïoh mynta na ka daw jong kiba bun ki aiñ bad ki jingthaw aiñ kiba la pyntreikam ha ka jylla,” ong u Nongïalam ka HYC.
Namar kata ka seng ka kyntu ïa ka sorkar Meghalaya ban pynsangeh ha shwa ban shim kino kino ki rai ban phrung hapoh ïa kitei ki jingpynkylla hapoh ka Meghalaya State Investment Promotion Facilitation Act, 2024 khlem da la ïoh ïa ki jingïamir jingmut, ki jingai jingmut, ki jingïasyllok na ki paidbah jong ka jylla.
“Kumba ka long, ka jaka ka dei ka tiar kaba duna bha ha ka jylla bad kum ka kaiphod kumba 70% jong ka jingdon ki nongshong shnong jong ka State ki dei ki bym don ki jaka ne ka khyndew ka shyiap. Ha ka jingshisha ka sorkar kadei ban ai jaka ne thaw ïa ki land bank na ka bynta kine ki nongshong shnong ki bym don jaka bad ym dei ban khih khohreh ban pynbiang jaka tang na ka bynta kine ki karkhana ne ki corporate ne private investor,” ong u Nongïalam ka HYC.