Shillong, Nohprah 16 : U Myntri ka sorkar jylla u Rakkam A Sangma u ong ba ki Kynhun Niam kim ju byrngem hynrei ki dei na ka bynta ka jingsuk, kumta u ong ba ki kyndit bad kim lah pdiang ban ïohi halor ka jingbyrngem jong ka KSP ban khang ïa ki surok ba kongsan jong ka Meghalaya.
“Nga ju ong ba ki kynhun niam kim ju byrngem, kumta kum kine ki dei ki jingjia ki bym sngewtynnad satia ban ïohi. Ha ka jingshisha ki kynhun niam ki dei na ka bynta ka jingsuk. Ngi mane ïa U Blei na ka bynta ka jingsuk bad jingsuk na ka bynta ki briew shimet, na ka bynta ka iing ka sem bad na ka bynta ka imlang sahlang”, u la bynrap shuh shuh haba kren bad ki lad pathai khubor.
Lah ban kdew hangne ba dang shen, ka Kutumba Surakshya Parishad (KSP) ka la pynbna ba ka ai por 10 sngi ïa ka sorkar Meghalaya ba kan plie noh ïa ka krem Mawjymbuin na ka bynta ka jinglehniam jong ki Hindu. Katei ka kynhun, ka la maham ban khang ïa ki surok ba kongsan jong ka Jylla Meghalaya, kynthup ïa ka Jorabat, kaba don hajan Guwahati, lada ym lah ban pynurlong ïa ka jingdawa jong ki, ha shwa ka Khristmas.
Da kaba pynpaw ba ki kynhun Hindu ki dei ban burom ïa ka jingsngew jong ki trai shnong, u Myntri u ong ruh ba ka jingmane blei kam dei tang ha Mawsynram ba kin ïoh ïa ki jingkyrkhu hynrei lada kwah ban mane ïa u Blei ki lah ban mane ha ki iing ki sem, ha ki jaka ba marjan bad ki jaka mane blei kiba don hajan khamtam kum ha Assam ba ki don bunbha ki jaka mane blei kiba heh.
