Shillong, Nohprah 16 : Ka kynhun ki nonghikai SSA ha ka jylla hapoh ka lama jong ka Meghalaya SSA Schools Association (MSSASA) ha ka sngi Nyngkong ka la shim ïa ka rai ban pynsangeh noh shwa ïa ki rai jingïakhih jong ki bad ban bteng shwa da ki jingïakren bad ka sorkar jylla haba ïadei bad kiba bun ki mat jingdawa jong ki.
“Ha ka jingïalang kaba ngi long mynta ka sngi, ngi la shim lai tylli ki rai bad ngi la rai ruh ban weng noh ïa ka jingthmu ïakhih jongngi namar ngi la rai ban ïaid shwa da ka lynti jong ka jingïakren bad ka sorkar,” ong u President ka MSSASA Bah Aristotle Rymbai haba kren bad ki lad pathai khubro.
Katkum ka jingïathuh jong u ha kane ka synjuk jong ki 13000 ngut ki nonghikai, ki la shim ïa ka rai ban kyrpad ïa ka sorkar ba kan pyllait noh ïa ki nonghikai SSA kiba sdang hikai naduh shwa ka 1tarik Naitung, 2020 ba kin ym donkam ban ïakhun ïa ka eksam Meghalaya Teachers’ Eligibility Test (MTET).
Nangta kawei pat ka mat jingdawa kaba ki buh ka long ba ka sorkar kadei ban thaw da ka Empowered Committee kaban peit bniah halor ki mat bad ki shu ba ka SSA ka buh, kaba kynthup naduh ka jingdawa ban don noh da ka Polisi halor ka kam jong ki nonghikai SSA ha ka jylla.
La tyrwa ruh ba ki dkhot jong kane ka Committee ki dei ban long na ka tnad Law, Personel, Finance, Planning, Education bad ruh na ki nongïalam jong ka Synjuk.
