Shiteng synïa ka BJP ka pyndam ïa ka Article 370 kan leh kumjuh ïa ka 6 schedule: Congress
Ngi kyrmen ban thaw sorkar lada ym kumta ngi kham lah ban shong liang pyrshah
Shillong, Rymphang 12: U General Secretary in-charge of Communication jong ka All India Congress Committee (AICC), u Jairam Ramesh u la maham ba kumba ka sorkar NDA ba la ïalam da ka BJP ha Delhi ka lah ban pynduh shiteng synïa ïa ka jylla Jamu and Kashmir (J&K) ban pynkylla sha ka Union Teritory bad ban weng ïa ka Article 370 kaba ai jingïada kyrpang ïa ki trai muluk katei ka jylla kam don jingeh ruh ba kan leh kumjuh ïa ka 6 Sixth Schedule haka jylla ka BJP kan lah ban leh kumtei.
Haba kren sha ki lad pathai khubor ha ka sngi Saitjaiñ u Jairam Ramesh u la ong ba ïa ka jinglong kyrpang ki jaidbynriew dei tang ka Congress kaba sngewthuh bad kaba ïaleh ruh ban ïada ïa ka hok jong ki lyngba ki aiñ ba la pruid dak ha ka riti synshar ka ri.
“Ïa ka khyrnit ba hynriew ka riti synshar dei ka Congress kaba la pynrung ha ka Riti Synshar namar ka sngewthuh ïa ka jingdonkam ïa ki rit paid ha ka ri bad ïa ka jingdonkam ban ïada ïa ka hok ba kin roi kin kiew. Phin peit ha J&K la pynduh ïa ka jinglong jylla bad la weng ruh ïa jingtreikam ka Article 370 bad kane ka apot ka lah ban jia ïa ka 6th Schedule ha ka jylla lada wan biang ka BJP,” u la ong.
Haba kylli haduh katno seat ka Congress ka kyrmen ban jop u Jairam u la jubab, “Ngi pynïakhun ki kyrtong kiba dang biang bha ka rta bad haduh 10 ngut ki kynthei bad ngi kyrmen ba ngin leh bha ban ïoh thaw sorkar.”
“Shu buh lada kumno kumno ngim ïoh thaw sorkar ngi dang kham lah ban shong kum ka liang pyrshah ban ïa kaba thaw sorkar bad kiwei ki party team A, B C.. ka BJP hynrei kum ka party ngi kyrmen ïa kaba bha tam bad ai lad shuwa kan poi ka elekshon bad ka jingniew vote ngin peit kaei kaba donkam ban leh,” jubab u Jairam ïa ka jingkylli bad no ka jied ban ïateh lok hadien ka elekshon.