Shillong, Rymphang 12 : Ka jingpynthoh bria ïa u kyrtong ka UDP na ka North Shillong Constituency u Dr Aman War da ki jingkynnoh ba khlem nongrim halor ka jingpynlut jingpynsep ban ïakhun ïa ka khlam COVID-19 ka dei namar ba u khlaiñ bha bad u don ha ka thong ban jop, ong u bah P.T Sawkmie MLA ba rim ka Mawlai bad kyrtong ka UDP na Mawlai Constituency.
Haba ïakren bad u nongthoh khubor u bah P.T Sawkmie u la ong “ Na ka liang u Dr Aman War u la dep ai jingkheiñ thik pa thik ba ka jinglut ka poi tang 248 klur tyngka kata naduh ba thied ïa ki dawai, ki injekshon ban ai injek ïa ki briew kiba ïabit ïa kane ka khlam, ban pynbiang ki jingthiah, ki oxygen, ki jingpynbiang ha ki corona care centre, ki jingpynbiang bam bad ter ter. ïa kane ka jingkheiñ jingdiah la dep rah hapoh ka ïing dorbar thawaiñ ka jylla ruh.Kane ka jingpynlut ka long tang hapoh ka jingpeit ka Directorate ba peit da u Dr Aman War ha kato ka por ba u dang long u DHS (MI).Kumta ban kynnoh ba ka don ka jingpyndonkam bakla kam long kaba dei”.
ïa katei ka jingkheiñ ba thymmai kaba la wanrah ba la pynlut haduh 816 klur tyngka kata hadien ba u la shongthait na ka kam, dei ban buh jingkylli ïa u Myntri Rangbah u Conrad K Sangma bad ïa u Myntri ba peit ïa ka tnad ka koit ka khiah u James K Sangma, haei la pynlut ïa kane ka pisa kaba tam nalor katei kaba la dep ai jingkheiñ jingdiah.
“Kam dei ka rukom ban shu kynnoh ïa u Dr Aman khlem nongrim bad khlem ki jingshisha tang na ka daw ka election. Kynmaw ba kito kiba kynnoh ïa u Dr Aman War, kin sa babe ha kawei ka sngi naar kan sa kyrtoh kylla sha ki namar haba kynnoh dei ban don bad ki nongrim kiba biang” ong biang u bah Sawkmie.
U la ong wat ki nongwad RTI ruh ki la dep wad na ka ophis u DHS (MI) ha ka por ba dang don u doktor ha ka kam bad kumba la kwah da ki nongwad RTI kumta ruh la ai jingkheiñ jingdiah bad ki khlem lap kano kano a jingpyndonkam bakla.
Shuh shuh u la ong ba sa kawei dei ban kynmaw ba haba pynlut ïa ka pisa kam lah ban long khlem ka jingtip bad ai jingbit ki bor bahalor kata naduh ki myntri sorkar haduh ki ophisar ha ki kyrdan ba shalor. Kumta ban shu kynnoh ïa u ophisar uba peit ïa ka Directorate kam sngew dei satia namar ma u u hap ban pyntreikam ïa kaei kaba kiba nalor ki bthah.
“ Kumta dei na kane ka daw nga sa ong ba kiba dei ban don ka jingkitkhlieh bad kiba dei ban jubab halor kane ka jingpynlut ka dei u Myntri Rangbah bad u Myntri ka tnad ka koit ka khiah ym ban shu kynnoh bad tei pop ia u Dr Aman War tang namar ba u khlaiñ kum u kyrtong ka UDP na ka North Shillong Constituency ” ong u bah P.T Sawkmie.
U la ong shuh shuh “ Ai ba kine ki jingkynnoh ba khlem nongrim kin long pynban ki jingkyrkhu ïa u Dr Aman War ba ki paidbah ka North Shillong Constituency kin ai ka jingkyrshan ba pura ïa u kum u briew uba trei hok ïa ka kam khlem thiah khlem dem ha ka por jongka khlam COVID ïa kaba la sakhi ruh da baroh ki Dorbar Shnong khnang ba un ïoh ïa ka jingjop ba don burom ha kane ka kynti ba mynta”.
