Shillong, Rymphang, 12: Ka Bharatiya Janata Party (BJP) ha ka sngi U Blei ka la kynnoh ba ka Seng Congress ka dei u Suri kup snieh Langbrot.
Kane ka jingkdew kti jong ka BJP ka long hadien shi sngi ba ka Congress ka la pyllait paidbah ïa ka Manifesto-ka jubanlak elekshon ban pyntreikam lada ka Congress ka wan ha ka bor hadien ka elekshon ka ban sa long sha ka Iingdorbar Thawaiñ ka Jylla ha ka 27 tarik mynta u bnai.
Ha u kyrwoh ba la phah sha ki lad pathai khubor, ka BJP ka la kynnoh ba ka jingïalap elekshon jong ka Congress ha kane ka Jylla ka long kum ka jingibeiñ ïa ki paidbah. “Ban phah ïa ki nongïalam ki bym larkam kum u Jairam Ramesh sha ka Jylla ka pyni kumno ka Congress ka kheiñ ba ka Meghalaya ka dei ka jylla ka bym da kongsan eh,” ong ka BJP ha u kyrwoh.
U National General Secretary ka BJP u Tarun Chugh u la ong ba kam da dei than kaba shu khlem khmihlynti lymne kaba thymmai. “Ka Congress ka ju leh meinah borabor ïa ka thaiñ Shatei Lammihngi. Dei tang hadien ka jingshimti jong ka Sorkar BJP hapoh ka jingïalam jong u Narendra Modi ba ka Sorkar Pdeng ka la sdang ban phaikhmat sha kane ka thaiñ bad ban theh ïa ki song pynroi. Ïa ki jingtrei shitom jong u Modi lah ban ïohi lut da baroh,” u la ong.
Haba kynthoh ïa ki jubanlak elekshon ba la khlei da ka Congress, u Tarun Chugh u la ong ba ka Congress dang shen ka la shim nuksa ïa ka ri Sri Lanka kaba la mad ïa ka jingdap ram bad kum ka jingpyrshang wad bniah, ka kwah ban pyntreikam ha kane ka jylla Meghalaya. Ka jinghiran ha ka jingbym ïohkam, ka jingsahdien bad ki lyoh kiba la teh kynjri ïa ka jylla Meghalaya bad kaba khanglad ban ïaid shakhmat-ki dei ki jingai sngewbha jong ka Congress kiba ka jylla kam kwah satia.”
“Ki jubanlak ba la khlei da ka Congress ki dei kiba ladep pynurlong suda da u Myntri Rangbahduh ka ri sha ka Jylla bad ha ka ri baroh kawei. Kane ka kdew ba ka Congress ruh ka thmu tang ban shu bujli kyrteng ïa ki skhim ka Sorkar Pdeng (ha ka kyrteng jong u Rajiv Gandhi lane ïa ka kyrteng jongno jongno na ka ing ka sem ki trai iing) bad ban ym leh eiei kum ka Sorkar Jylla,” la kynthoh u Ghugh.
U Chugh u la kyrpad ïa ki paidbah ka jylla Meghalaya ban peit ruh ïa ki rukom treikam jong ka Congress. “Ki nongïalam ka Congress ki kheiñ ïalade kum kiba heh bahaiñ bad kiba khrawbor, bad ki hiar na ki dulan paki ban ïakynduh ïa ki paidbah tang shisien ha ka san snem,” la kynthoh u Chugh.
Haba maham ïa ki paidbah ba ki dei ban peitngor bha ïa ki jingthmu ba shisha jong ka Congress, u Chugh u la ong, “ka dei kane kajuh ka party kaba don ïa ka ‘Law of Asylum’ kum shi bynta ka manifesto jong ki bad ki kwah ban pynlong aiñ ïa baroh ki nong Bangladesh lyngba kane ka aiñ. Ka Congress ka dei ka kynhun jong ki suri ba thngan kiba kwah ban thom ïa ki paidbah bym tip eiei jong ka jylla Meghalaya da kaba phong ïa ka snieh langbrot. Ki dei ki nongsdang ïa ka buit ban phiah bad synshar bad ki bat ïa ka bor synshar da kaba pynlong ïa ki briew ban duk, ban ym ïohbor bad ban shu ap. Ka jinglong kyrpang jong ka jaidbynriew, ka niam bad ka snap ba kyrpang ki dei tang ki katto katne ki atiar hapoh ka thiar buh tiar thma ka Congress ba ka ju pyndonkam ban teh ïa ki briew. Ka BJP, ha kawei ka kynti, ka dei ka party kaba shisha bad kaba wad ai ka jingshisha ban pynneh, ban buh jingtip, ban kyntiew ïa ki jinglong tynrai bad ki kolshor jong ki paidbah.”
Haba bynrap halor kane, u MLA ka BJP u Bah Alexander L. Hek, u la ong, “ka Congress ha ka jingshisha ka la leh ibeiñ ïa ki nongshong shnong ka jylla lyngba ki jingkren jong ki. Ka BJP ka burom ïa ka iktiar jong ki paidbah.”
“Ha ka jingshem jong nga, ka Congress ka dei ka party kaba shu pynleit jingmut thik tang ban ïoh tehlakam ïa ki paidbah, bad ban pyndap ïa la ki jong ki pla,” la kynnoh u Bah Hek.
Da kaba kdew ïa ka rukom synshar ka Congress ha ka jylla, u Bah Hek u la ong, “ka Meghalaya mynta ka donkam ïa ka roi ka par, ka sorkar jong u paidbah ba tang ka BJP ka lah ban ai. Ka BJP ka la pynpaw ïa ka jingkotbor ban pynurlong ïa ki jingkular jong ka Sorkar Pdeng bad ha baroh ki jylla bad mynta ka la dei ka por ïa ka Meghalaya ban mad ïa kaba ki deihok ban kiew bad ban san hapoh ka jingsynshar jong ka sorkar BJP.”
U la kyntu ïa ki paidbah ba kim dei ban shah thied na ka bynta ka lawei jong ka jylla tang da ki jingkular ba thylli jong ka Congress.
