Ka Sorkar ba ïalam da ka NPP ka la trei shitom ban pynneh ïa ka shongsuk shongsaiñ ha Meghalaya: Conrad Sangma

Tura, Rymphang, 12: U National President ka National Peoples Party (NPP) u Conrad Sangma ha ka sngi U Blei u la ong ba ka Sorkar ba ïalam da ka NPP ka la minot bad trei shitom ban pynneh pynsah ïa ka shongsuk shongsaiñ ha ka Jylla.
“Bun kiba la pyrkhat watla ka jylla ka dei kaba la shah lynshop ha ki kam lehnoh bad kan ïaineh kumjuh, hynrei, ngi la buh thong ban pynthikna ba ka shongsuk shongsaiñ ka ïai neh ha ka jylla. Ki tnat syntiat jong ngi, borabor ki long kiba peitngor bad kiba phikir halor ka jingshah lute bad kiwei kiwei ki kam runar ruser, bad ngi la lah ban ïakhun kiba bun kum kine ki jingjia khnang ban pynthikna ba kum kine ki jingjia kin ym jia satia,” ong u Conrad uba long ruh u Myntri Rangbah ka jylla haba kren ha ka jingïalap elekshon ha ka shnong Thakurbari, South Tura Constituency.
Haba kdew ïa ki jingïakhih jong ki sengbhalang ha Shillong, une u nongïalam ka NPP u la ong, ‘ki paidbah ki sheptieng ban ïaid ha surok jong ka nongbah Shillong hadien ki jingjia. Don bun ki jingjia kaba ktah ïa ka shongsuk shongsaiñ, hynrei kata kam mut ba ka Sorkar ka shu sngap jar. Ki Pulit jong ngi ki la peitmiet peitiong ban ïakhun ïa kine ki jingjia khnang ban pynthikna ba ka shongsuk shongsaiñ kan wanphai biang ha kito ki por.”
U la ong ruh ba ka Sorkar jong u ka don ïa ki thong na ka bynta ka Meghalaya napdeng ki 10 tylli ki Jylla bapawkhmat ha ka ri. “Bun kiba kren beiñ ïa ki thong jong ngi. Ngi dei ban shah shitom khnang ba ngin dup lah ban pynlong ïa ka Meghalaya kaba sarong da ki thong kiba bun,” u la ong
U la ïathuh ba ka Meghalaya ka la shah jied kum ka Best in start-up Ecosystem ha ka ri India, da kaba kiew na ka kyrdan kaba 27 sha kaba 2 mynta ha kaba pynurlong ïa ka jingai injekshon, lyngba ka skhim JJM la lah ban pynpoi ïa ka umbam umdih sha ki 2.5 lak tam ki longiing da kaba pynpoi ïa ki pipe um kaba long tang 4000 hajar ha u snem 2018.
“Ka Sorkar jong ngi ka la buh ruh ïa ka thong ban pynlong ïa ka Meghalaya kaba ïaid shakhmat,” u la ong bad bynrap, “ki paidbah ki la pynkylla ïa ka rukom pyrkhat ban dup kynjoh ïa ka thong kaba ki la angnud.”
Haba kren shaphang ki kam pynroi ha ka constituency jong u ha South Tura ha ki san snem, u la ong ba ki paidbah ki la dawa ïa ki Street Light, Community Hall, ka umbam umdih, ka surok sha ki shnong hapoh ka South Tura, bad kine baroh la lah ban pyndep pura ha kiba bun ki shnong bad ka don ruh kawei ka shnong kaba dawa wat ban pynïoh skhim ban shna ïa ka pung jngi.
“Ïa ka jingkhmihlynti jong ki paidbah ka Tura ngi ladep kren, ki paidbah ka Tura ki la shah iehbeiñ da ki snem, hynrei mynta ngi la lah ban pynurlong ïa ka jingangnud jong ki paidbah. Ngi la lah ban pynurlong ïa ki kam pynroi ha Tura lyngba ka Smart Town Project, ka Town Beautification,” u la ong.
Shuh shuh u la ïathuh, palat 250 tylli ki shnong ki la ïoh ïa ki surok kiba dang shna ha Tura, bad 70-80 percent na ka jingdon ki nongshong shnong ha Tura ki la ïoh ïa ka umbam umdih.
U la ong ba u angnud ban theh shuh shuh ïa ki song pynroi ha Tura. “San snem mynshwa bun na ki shnong ha Tura ki la mad ïa ka jingkyrduh um, hynrei ka sorkar jong nga ka la lah ba pynduna ïa kane ka jingeh jong ki paidbah.”
“Ki jingkular jong nga sha ki paidbah nongshong shnong jong ka Tura ka long ba ngin trei na ka bynta jong ki paidbah. Ki paidbah ka Tura ki la jied ym tang ïa u MLA hynrei ïa u Myntri Rangbah ka Jylla Meghalaya,” la pynbna u Conrad.
U la ïathuh shuh shuh ba ka NPP kan sa thaw ïa ka Sorkar da ka jingjop bun paid bad ki paidbah ruh kim dei satia ban duh ïa kane kabu.