Kynshi, Jymmang 15: Ka shnong Kynshi mynta ka sngi, ka la shong shit puk haba baroh saw ngut ki MLA jong ka VPP ki la hiar sha kane ka Shnong ban pynrung dkhot ïa ki paidbah sha ka Party. Ha kane ka jingïalang kaba la pynlong ha Kynshi Mawria, da ki hajar ngut ki paidbah kiba la wan na ki Shnong bapher bapher jong ka Mawthadraishan Constituency ban wan sngap ïa ka jingpynshai na ki nongïalam jong ka Party halor ki nongrim jong ka Seng bad kumjuh ruh halor ka jingïakhih halor ka ka Reservation Policy bad ka Roster System.
Haba kren ha kane ka jingïalang, u Bah Ardent Miller Basaïawmoit, President jong ka Seng, u la ong ba ka VPP kam dei tang ka Seng kaba la mih ban ïaleh elekshon, hynrei la seng ïa ka na ka bynta ban pynim pat, ban pynbha pat bad ban pynkylla dur ïa ka jylla. “Ngi dei ka Party kaba dang shi snem san bnai, hynrei ngi la ïoh ïa ka jingieit bad ka jingshaniah na ki paidbah kylleng kylleng ki jaka ka Ri Khasi Jaiñtia”, la ong u Bah Ardent.
U la ong ba ka Seng ka rai ban leit pynrung dkhot da ki nongïalam, namar kam kwah shuh ban leh kumba leh kiwei pat ki Party, hynrei shuwa ban pynrung dkhot ne ba ki paidbah kin pynïasoh bad ka Seng ki donkam ban da sngewthuh shai shuwa ïa ki nongrim jong ka Party bad kumjuh ruh ki dei ban da sngewthuh bha ruh kaei ka kamram jong ki haba ki pynïasoh bad ka Party.
U la pynshai ruh halor ka jingbun ki briew kiba kwah ban pan tiket na ka Party ban ïakhun ïa ka elekshon MDC bad dei namar kane ka daw ba ki nongïalam ki hiar hi man la ki jaka ban pynsngewthuh ïa ki paidbah ba ym dei tang kito kiba kwah ban ïaleh elekshon kin wan pynïasoh bad ka Seng, hynrei donkam ïa ki briew kiban trei bad kiba sngewthuh bha ïa ka lynti ïaid jong ka Seng bad khamtam eh ïa ki nongrim jong ka. “Ngim kwah ïa ki briew kiba kop ba ki la don lypa da ki hajar ngut ki briew, hynrei ynda kim ïoh tiket pat kin mih noh na ka Seng”, la ong u President ka VPP, da kaba bynrap ruh ba kiba kum kita ka Seng kam kwah hi ruh ba kin rung ne pynïasoh bad ka Seng.
U Bah Ardent u la pynshai ruh halor ka jingïakhih jong ka Party halor ka Reservation Policy bad ka Roster System da kaba ong ba ka jingbuh por 48 kynta ïa ka sorkar ban pynsangeh shuwa ïa ki jingkhot thep kam kadei namar ba ka Roster System ba la pyntreikam da ka sorkar MDA ka la ktah palat ïa ki Samla wad kam wad jam. U la wer ruh ïa ki paidbah ba kin kyrshan ïa ka Party ha kane ka jingïakhih ban dawa pynbeit nih ïa ka Resrvation Policy.
Ha kane ka jingïalang la ïoh jingkren ruh na u MLA ka North Shillong, u Bah Adelbert Nongrum bad u Bah Brighstarwell Marbañiang, MLA jong ka Mawlai. Ïa ka jingïalang la pynïaid da u Bah Grossper Ryntathiang, uba long u Treasurer jong ka Seng.
