Plie u Sonowal 6 tylli ki jingtei ba thymmai ha NEIAH ha ka jinglut ba 60.16 klur tyngka

Shillong, Jymmang 15 : U Myntri Sorkar Pdeng ba dei khmih ïa ki tnat Ports, Shipping & Waterways bad Ayush, u Sarbananda Sonowal u la plié paidbah ïa hynriew tylli ki jingtei ba thymmai jongka Project II ka North Eastern Institute of Ayurveda & Homoeopathy (NEIAH) mynta ka sngi ban pynkhlaiñ ïa ka jingtreikam. Ka jinglut jingsep ban tei ïa kine ki hynriew tylli ki jingtei ka long kaba la antad ban tam ïa ka T 60.16 klur tyngka.
Ha ka jingai jingkren jong u Sarbananda Sonowal u la ong, “Nga dap da ka jingkmen ba ngi la lah ban plié paidbah ïa kine ki hynriew tylli ki jingtei ha Shillong mynta ka sngi. Kin kyntiew ïa ka jinglah treikam jong kane ka jaka ai jinghikai kaba lah ban don ka bynta kaba khraw ha ka jingkyntiew ïa ki rukom sumar tynrai ha kane ka thaiñ.
Hapoh ka jingïalam lynti u Myntri Rangbah Duh, u Narendra Modi, ngi dang shim ïa ki sienjam ban wanrah ïa ka jingwad bniah ha ki rukom ai jingsumar tynrai ha ryngkat ki rukom sumar katkum ka juk mynta. Ngi ïohi ïa ka bynta kaba khraw ha ka jingïatreilang ki lad ai jingsumar ha kane ka ri ha ki snem ba dang wan. Ka jingbei tyngka jong ka Sorkar lyngba kine ki jingtei kiba thymmai kin pynkhlaiñ ïa ki sienjam ban pynkhyllie im biang ïa ki rukom ai jingsumar tynrai ha kane ka thaiñ jong ka ri. Nga dap da ka jingkmen ban ïathuh ïa phi ba shen ka NEIAH kan sdang ban pyntreikam ïa ki kali kit nongpang.”
Kine ki hynriew tylli ki jingtei ba thymmai ki kynthup ïa ka hostel na ka bynta ki shynrang ha kaba lah ban sah 104 ngut, ka hostel na ka bynta ki kynthei ha kaba lah ban sah 104 ngut, phra tylli ki Type III quarter, 6 tylli ki Type IVA Quarter, 7 tylli ki Type IVB ba long ruh ka jaka sah u Director, ka hostel na ka bynta ki senior resident ha kaba don 25 tylli ki jaka sah, ka guest house kaba 19 kamra bad 2 tylli ki kamra kiba kham bha.
Ha ka jingkren shaphang ka bynta jong ka thaiñ shatei lam mihngi ha ki lad ai jingsumar tynrai, u Sarbananda Sonowal u la ong, “Ka thaiñ shatei lam mihngi jong ngi ka dei kaba la ïoh jingkyrkhu na ka mei mariang bad ki jingai jong ka ki la ai ïa ki lad ïa ngi ba ngin ai jingsumar naduh ki por mynshuwa. Ngi kwah ban rah shakhmat ïa kane khnang ba kiwei kiwei ruh ki ïoh jingïarap na kane bad kin ïoh ïa ka jingim kaba kham bha. Ka jingthmu jong u Myntri Rangbah Duh ka dei ban kyntiew ïa ka jingïar jong ki lad ai jingsumar kiba treikam bad kiba ïaid ryntih. Da kaba peit sani ïa ka jingpyniar ïa ka jinglah wad bniah bad da kaba tei ïa ka nongrim science ha ki lad ai jingsumar tynrai, nga ngeit ba kine ki hynriew tylli ki jingtei ba thymmai ba la plié paidbah mynta ka sngi kin ïarap bha ïa ka NEIAH ba kan kot ïa kane ka thong.”
Ki nongïoh jingsumar ha ka NEIAH ki dang kham bun katba dang ïaid ka por namar ki briew ki ïoh mad ïa ka koit ka khiah ha kane ka hospital. Ha u snem mang tyngka 2022-23, ki la don 52,088 ngut ki briew kiba ïoh jingsumar na ki OPD clinic katba 504 ngut ki nongpang ki dei kiba la sah ha kane ka hospital ban ïoh ïa ka jingsumar. Ha kaba ïadei bad ka Ayurveda, ki la don 36,683 ngut ki nongpang kiba la leit sha ki OPD clinic jong ka NEIAH bad 482 ngut ki nongpang ki dei kiba la thiah ha ka bynta IPD jong kane ka jaka ai jingsumar. Ha kaba ïadei bad ka Homoeopathy, ki la don 19,397 ngut ki nongpang kiba la ïoh jingsumar ha ki OPD clinic katba 22 ngut ki nongpang ki dei kiba la sah ha kane ka jaka ai jingsumar. La pynlong haduh 35 tylli ki health camp bad 4 tylli ki CME (Continuing Medical Education) da ka NEIAH ha kane ka juh ka samoi.
Ha kane ka sngi, la wan ïashim bynta lang ruh ki Symbud Kongsan, kiba long ka Dr Mazel Ampareen Lyngdoh, Myntri ka tnat ka koit ka khiah, Sorkar Meghalaya bad u Bah AL Hek, Myntri ka tnat Animal Husbandry and Veterinary, Sorkar Meghalaya. Prof. Prabha Shankar Shukla, Vice Chancellor, North Eastern Hill University (NEHU); Prof (Dr) Nalin Mehta, Director, North Eastern Indira Gandhi Regional Institute of Health & Medical Sciences (NEIGRIHMS) bad Dr Neeta Mahesekar, Director, NEIAH.
Ha ki kam ai jinghikai, ki la don mynta haduh 6 tylli ki kynhun shah hikai ha ka Bachelor of Ayurvedic Medicine & Surgery (BAMS) bad Bachelor of Homeopathic Medicine & Surgery (BHMS) ha NEIAH. Na ki 50 ngut ki shah hikai ha u snem 2016-17, ka bor ban ai jinghikai ka la kiew sha ka 63 ngut ki shah hikai ha man ka kynhun shah hikai. Ki jingai jinghikai ki ïasnoh bad ka North Eastern Hill University (NEHU), Shillong, Meghalaya.
Ka North Eastern Institute of Ayurveda & Homoeopathy (NEIAH) ka dei ka jaka ai jinghikai kaba peit hi dalade hapoh ka Tnat Ayush jong ka Sorkar India. La seng ïa ka NEIAH ban ai ïa ki lad ai jingsumar ïa ki briew ka thaiñ shatei lam mihngi bad ka jylla Sikkim hapoh ki rukom sumar Ayurveda bad Homoeopathy. Kane ka jaka pule mynta ka pynïaid ïa kane ka kolej na ka bynta ka Ayurveda bad kawei ka kolej na ka bynta ka Homoeopathy ha ryngkat bad ki hospital ba ïadei bad kine.
Kane ka jaka ai jingsumar ka don ka hospital Ayurvedic kaba don 60 tylli ki jingthiah nongpang bad ka Homoeopathic hospital kaba don 20 tylli ki jingthiah nongpang. Ki hospital ha ka jaka jong ka NEIAH ki dei kiba la don ki private ward, bad ka kamra pynkha khyllung, ka Operation Theatre, Yoga centre, Physiotherapy unit, Panchkarma unit bad kiwei kiwei. Ki lad wad bniah kum ka ECG, USG, X-ray, ki laboratory, Nadi Tarangani bad kiwei kiwei ki dei kiba la biang lut ha kane ka jaka. Ka jaka pule ka don 7 tylli ki OPD ha ka Ayurveda bad 5 tylli ki OPD ha ka Homoeopathy. Ka don ka IPD kaba pura ha kaba don 60 tylli ki jingthiah nongpang ha ka Ayurveda bad 20 tylli ki jingthiah nongpang ha ka Homoeopathy. Ka NEIAH ka don ha ka jaka kaba heh haduh 20 acre.