17 tarik yn shong ïakhih ka VPP hajan Secretariat ban sngap mynthi ka Sorkar

Shillong, Jymmang 15: Ka Voice of the People Party (VPP) ka la rai ban pynlong da ka jingïakhih da kaba shu shong ha ka 17 tarik mynta u bnai naduh ka por 10 baje mynstep haduh ka por 4 baje janmiet ha jaka ïeng kali kaba don hajan Additional Secretariat.
Katkum ka khubor ba la phah da u Dr. Batskhem Myrboh, Nongaiktien jong ka Seng, la ong ba kane ka jingmih ban ïakhih kadei namar ka jingsngap mynthi jong ka sorkar halor ka jingbuh por ba 48 kynta da ka Seng naduh ka sngi thohdieng ban dawa ban pynsangeh shuwa ïa baroh ki jingkhot thepkam katba ym pat lah ban pynbeit thymmai ïa ka Reservation Policy.
“Na ka daw ka jingmynthi bad leh bym suidñiew jong ka Sorkar MDA 2.0 ba lam khmat da ka NPP, ka Seng ka la rai ban pynlong da ka jingïakhih ba shu shong ha ka 17 tarik mynta u bnai”, la ong u Dr. Batskhem.
U la ong ruh ba nalor ka jingdawa ban pynsangeh ïa ka jingthungkam katba ym pat lah ban bishar bniah ïa ka polisi bhah thungkam bad ka roster system, la dawa ruh ban thung da ka Expert Committee, ka ban shong pyrkhat bniah ïa kane ka kam da kaba kynthup ïa ki rangbah na baroh artylli ki jaidbynriew ka jylla ryngkat ki riewshemphang kiba tip bha ïa kane ka kam.
Naka liang ka Seng ka ïawer ïa baroh ki nongtrei jong ka Party bad ki paidbah ban ïa wan sha ka tei ka prokram jingïakhih ba la pynbeit ka Party. “Ngi dei ban kynmaw ba kane ka sorkar lamkhmat da ka NPP ka ialeh ban leh kyllut ïa ka rukom pyrkhat ba shongnia, ïa ka hok ka sot bad ka ka jingeh jong ki paidbah”, la ong ka Kyrwoh na ka VPP, da kaba ong ruh ba ïa ki wei pat ki prokram jingïakhih yn pynbna pat kham hadien.