Shillong Jymmang 13: U Symbud Myntri Rangbah ka Jylla Bah Sniawbhalang Dhar u la bthah ïa u Deputy Commissioner jong ka West Jaiñtia Hills ban thaw mardor da ka Peace Committee khnang ban wanrah biang ïa ka shongsuk shongsaiñ hapoh ka shnong Khanduli, West Jaiñtia Hills District.
“Nga la bthah ïa u Deputy Commissioner jong ka West Jaiñtia Hills ban thaw da ka peace committee namar balei kin (Pnar-Karbi) shu bteng ïa ka jingïashrut na ka por sha ka por,” ong u Bah Dhar ha ka jingïakren bad ki lad pathai khubor ha ka Lah Sngi u Blei.
U la ïathuh ba DC jong ka West Jaiñtia Hills un sa ïakynduh ïa ka DC jong ka West Karbi Anglong District lashai ka sngi Baar ban ïakren halor ka jingdonkam ban thaw noh da ka Peace Committee.
Katkum ka jingong jong u, ka jinglong jingman ha Khanduli ka la sdang ban jaijai bad haduh mynta kam don shuh kano kano ka jingjia.
“Ngi kyrpad ruh ïa ki paidbah na baroh ar liang (Khanduli bad West Karbi Anglong) ban ym ïa pynshit iwei ïa iwei pat,” ong u Bah Dhar.
Haba kylli u Dy. CM u la ong ba ka jingpyrshah jong ki paidbah ka long halor ka jingbuh ïa ka khyrdop khrong khajna na ka liang jong ka Assam ha Khanduli.
“Ngin sa shimkhia halor kane ka kam bad ha kyrdan ki Myntri Rangbah,” u la bynrap.
Ha ka sngi Palei jong ka taiew baladep, ka jingïakynad ka la khie hapdeng kine ki ar jaitbynriew ka shnong Khanduli. Ki nongshong shnong ki la ieng pyrshah ban pynieng ïa ka khyrdop khrong khajna da ki nongtrei jong ka Karbi Anglong Autonomous Council (KAAC).
Ka jingïakynad ka la mih ruh hadien ba dorbar shnong Khanduli ka la rai ban pyrkhing ïa ki jaidbynriew Karbi ban rung lyngba ka shnong Khanduli.
Ka dorbar shnong ka la rai ban khang ïa ki Karbi ban wan rung sha iew Khanduli hadien ba la kynnoh ba ki Karbi ki la byrngem ïa ki Pnar ban leit rep sha ki lyngkha ki risai.
Kane ka jingïakynad ka la pynlong ruh haduh u pud ban da mih ka jingshah kawang maw ka kali u Superintendent of Police ka West Jaiñtia Hills u Bah C. Syrti bad ka jingshah wiang ding jong ki ar tylli ki iing trep ha lyngkha jong ki Pnar.
Ha kane ka jingjia, u SP u la lait thaw da ka said na ka jingmynsaw katba ka kali jong u ka la julor malu mala.
