Meghalaya State League : Haduh 7-1 kol jop kput ka Khliehmawlieh ha Tura, ïakhaid ha Jowai bad pynliem ka Langsning ïa ka Umkseh ha Shillong

By Mawphor News Desk On May 17, 2023

Shillong,Jymmang 16 : Ka Khliehmawlieh Youth Club ka la sdang ïa ka samoi da ka jingjop kaba haduh 7-1 kol syndon ha ka lympung jong ka Meghalaya State League pyrshah ïa ka Atong Matgrik FC na ka Group D kaba long hynne ka sngi ha madan Chandmari, Tura.
Ha kane ka sngi kiwei ki jingïakhun pat ki long hapdeng ka Rangdajied United FC kaba ka jingïakhun ka la kut ha ka jingïakhaid da mar 1-1 kol bad ka Ladthalboh SC ha ka jingïalehkai kaba itynnad bha kaba long ha Kiang Nangbah Stadium, Jowai ha ka Group B. Katba ha kawei pat ka jingïakhun ka Langsning pat ka la ïoh ban pynliem noh ïa ka Umkseh SC da 3-1 kol na ka Group A ba ka jingïakhun kaba long ha Shillong ha madan ïalehkai jong ka MFA.
Haba phai sha ka jingïakhun kaba nyngkong, ïa ki hynñiew tylli ki kol jong ka Khliehmawlieh la ïoh ban thep da u Rodyson Dkhar naduh ka minit kaba 14 jong ka jylla step kaba kylla long ka jop kaba ai mynsiem ïa ka kynhun ha shwa ba u Sharan Sing Nonglang un pynbud ïa ka kol kaba ar ha ka minit kaba 20.
Katba ïa ka shi kol jong ka Atong Matgrik la ïoh ban thep ha ka minit kaba 36 lyngba u Rakchuwell Marak kaba pynlong ïa ka jingïakhun ban kut da ki 2-1 kol ha ka kylla step.
Hynrei ka jingïalehkai ha ka kylla miet ka la kylla kynsan hadien ba ka Khliehmawlieh ka la ïoh ban pynkhih bunsien bha ïa ka jar jong ka Atong Matgrik ïa kaba la sdang da u Istarbon Marngar ha ka minit kaba 69, nangta u Lenny Kravity Lyngdoh ha ka minit kaba 71, u Dadap Marwein ha ka minit kaba 73, u Kynjai Myrthong ha ka minit kaba 83 bad ruh na u rangshong ben ka kynhun u Rishotbor Lyngdoh ha ka minit kaba khatduh jong ka kylla miet kata ha ka minit kaba 90+3.
Ha ka jingïakhun kaba long ha Jowai pat, ka Rangadjied ka la ïoh ban lamkhmat lyngba ka bol kaba la khyrwit jam bha da u Knerktilang Buam tang ha ka minit kaba 12. Katei ka bol ka la wan sha u na ka jingbakla pashat bol u rangïalehkai ka Ladthalboh bad kumta da kaba shim kabu ïa kane, u la shu pyndep tïak ïa ka bol shakhmat bad khyrwit jam ïa ka sha jar na ka jingjngai kaba 30 pruh.
Tangba katei ka jingïoh lamkhmat jong ka Rangdajied kam shym la neh slem namar dei tang ha ka minit kaba 31 u Ebanskhem Nongtdu u la ïoh ban pynïakhaid ïa ka jingïakhun ban neh da mar 1-1 kol tad haduh ban da kut ka kylla step. Kane ka jingïalehkai ka dang ïai bteng wat ha ka kylla miet bad tad haduh ban da kut ka por ïalehkai ym shym la don satia mano mano ruh ba ïoh ban thep kol.
Ha Shillong pat ha ka jingïalehkai kaba don ha madan MFA, u Roikhihbha Nongtdu u la khyrwit haduh ar kol na bynta ka Langsning tang hapoh ki 10 minit ha ka jingïakhun pyrshah ïa ka Umkseh.
Ïa kane ka bol u Nongtdu u la ïoh lyngba ka bol kaba la pashat da u Milancy Khongstia ha ka minit kaba hynriew bad khlem bakla u la ïoh pynkhih ïa ka jar. Hynrei tang hapoh lai minit ei ei u Khongsita u la pashat bïang ïa ka bol sha u Nongtdu bad ha kane ka kynti ruh khlem bakla ka bol kaba u khyrwit ka la poi biang sha jar jong ka Umkseh.
Hynrei na ka liang ka Umkseh kam shym la pyndem satia hynrei ka la ïakhun tyngeh bad kumta tang ha ka minit kaba 54 ka la ïoh shi kol lyngba u Kyrshan Khongsit hadien ba u rangap kol ka Langsning um shym lah shuh ban kyrda ïa ka bol. Watla katta ruh ka langsning ka la ïoh biang ban thep sa shi kol kaba pynlong ia ka ban ïoh lamkhmat bïang sa ar kol ïa ka Langsning lyngba u Arnesius Marwein ha ka minit kaba 57 uba la ïoh ban pynkhih jar hadien ba ka bol kaba khyrwit da u Wilbert Marbaniang kam shym la lah ban rung sha kol.
La pyntip ruh ba kan don tang kawei ka jingïalehkai lashai, kata tang hapdeng ka Rymbai Ïawpynsing SC bad ka Niaw Wasa United ha ka por 2:30 baje mynsngi ha Kiang Nangbah Stadium, Jowai.