Haba peit sha ka jinglong jingman jong ka ïew ka hat bad kamai kajih ha kine ki sngi la ïohi ba kat shaba leit kat shaba phai ym don shuh ki jaka ban dang lait na ka jingïadei madan. Naduh ka ïewduh, Motphran, Them Umsohsun ter ter shaduh Khyndailat, shaduh kiwei pat ki dong bad ki shnong hapoh jong ka Sor Shilong shaduh Laitumkhrah Rynjah bad kiwei pat ki snong la ïohi ïa ka jingjyllei jong ki nongdie madan. Kumba long la lah ban ïohi bad ka kam die madan ka la dei kawei na ki kam kaba la plie lad ïa kiba bun ki longiing kiba duk ba toi bad kiba kloi ban trei shitom ba kin lah ban kamai jakpoh bad pynbit pynbiang ïa ki longiing jong ki. Hynrei kaba sngewkhia pat ka long ba la ïohi ba la don sa kiwei pat ki briew kiba bymdei ki trai jylla ne ki para ri kiba la shim kabu ïa kane ka kam jan ha baroh kitei ki jaka ba la kdew.
Hooid bun na ki nongshnong shnong jong ka nongbah Shillong ki pynpaw ïa ka jingbynñiaw halor ka jingwit ki lynti ki syngkieng haduh ba poi u pud ba ym don jaka shuh wat tang ban ïa ïaid kylluid ha ki lynti ïaid kjat ruh. Hynrei haba pyrkhat pat ïa la ki jong ki paradoh para snam kiba duk ba toi, ka mynsiem ka um bad don bun kiba pyrshang ban pynpaw ïa ka jingieit bad ka jingkyrshan ban thied ïa ki jhur, ki doh, ki mar khutia mutia haduh ki jaiñ ki nep na kiba die madan khnang ba ma ki ruh kin ïoh lem ïa ka hok ban im kum kiwei pat ki para briew. Yn nai ïakren eh shaphang jong ki bynta jong ka Khyndailad kiba baroh ngi tip ki dei kiba la shlei da ki nongwei hi, hynrei lada katta ruh ym dei ban ailad ïa ki briew kiba ym dei trai shnong ban wan khnieh ïa ka pliang ja jong ki trai shnong.
Ki trai shnong kita kiba ngi ong ki dei ki Khasi (Khynriam, Pnar, Bhoi, War, Maram, Lyngngam) shano pat kin lah ban leit lait na la ka jong ka ri ban wad jakpoh. Hynrei kitei kiwei pat ki bar jylla ki don ki jaka ban leit na ka bynta jong ki, kata ba kamai hapoh la ka jong ka jylla. Ha kine ki sngi la ïohi bad ka Khasi Hills Autonomous District Council (KHADC) hapoh ka jingïalam jong u Bah Pynïaid kum u CEM ka la shim khia ban peit ïa ka jinglong jingman jong ka khaïi hapoh ka ri Khasi ha kaba ki la leit ban jurip bad leh ïa kaba donkam.
Katno kum ki riew paidbah ngi lah ban shah shitom lang lem bad kitei ki duk ki toi kiba im ha ka kam die madan, hynrei ka long ka bymlah ban pyrkhat ba kum ki paidbah ngin duh noh ïa ka hok ban im laitluid bad ïaid laitluid tangba ban ailad pynban ïa ki briew kiba nabar ban wan kamai kpoh hapoh kane ka nongbah jong ngi bad ka long kumba ki khanglad noh pynban ïa ki trai jylla ban kamai hapoh la ka jong ka ri bad ka jylla. Kumta ka la dei ka por ba lada ym lah hi ban pynduh ïa ka jingkhapngiah na ki kam die madan, ka long pat kaba donkam ban khanglad ïa ki briew kiba nabar ban khanglad ïa ki trai jylla. Lada jia ba kim don ki trai jylla kiba die madan ieh kato ka jaka kan long kylluid eh na ka bynta ka jingsuk jingbiang jong ki paidbah nongïaid nongïeng la ka long ha kano kano ka shnong ne ka dong jong ka nongbah Shillong.
Dang shen la ïohi ba ka District Council ka la leit ruh ban khynra wat ha ki thaiñ jong ka Laitumkhrah ruh. Shisha hangne ruh la ïohi ba ka jingbun ki nongdie madan ka la jyllei bha bad ki la don ruh ki briew ki bymdei trai shnong kiba la sdang ban shim kabu bha. Ki trai shnong ki dei hok ban ïoh lad ban kamai hapoh la ka jong ka jylla namar ba kim don da kawei pat ka lad ban phet shawei bad lada ailad ïa ki briew kiba nabar sa ka ki kam die madan te ka lawei jong ka jylla ka la long shisha kaba dum bad ngin ym ïohi shuh ruh ïa la ka jong ka jaidbybnriew rit paid. Kumta kum ka imlang sahlang lada ym lah hi ban pynkylluid ïa ki lynti syngkieng ka bha ban ym ailad ïa ki briew kiba nabar ban wan pynwit ïa ki rud surok wat tang haduh ban pynïeng kali ruh ym don jaka shuh.
